Semeıde kópirge shyǵyp alǵan er adam psıhdıspanserge jetkizildi

Semeıde er adam aspaly kópirge shyǵyp alǵan. Qutqarýshylar ony túsirip alyp, psıhıkalyq emdeý ortalyǵyna jetkizdi, dep habarlaıdy QazAqparat Rolisia.kz-ke silteme jasap. 

«Qalalyq polıtsııaǵa jergilikti turǵynnan 28 jastaǵy azamattyń kópirdiń aspaly qurylymyna shyǵyp alǵany týraly habarlama tústi.

Oqıǵa ornyna dereý jetken polıtseıler aqparatty rastady. Bul aqparat birden Abaı oblystyq Tótenshe jaǵdaılar departamentiniń qutqarý bólimshelerine jetkizildi.

Polıtseıler qutqarýshylar kelgenshe jigitpen kelissóz júrgizdi», - delingen polıtsııa aqparatynda.

Málim bolǵandaı, tótenshe jaǵdaılar qyzmetkerleri alpınıstik quraldardy paıdalanyp, aspaly kópirdiń baǵanasyna shyǵyp, er adamǵa jetken. Solaı ony tómen túsirgen.

Qazirgi ýaqytta 28 jastaǵy oblys turǵyny psıhıkalyq densaýlyq ortalyǵyna jetkizilip, mamandar onymen jumys istep jatyr. Onyń mundaı áreketke barý sebebi anyqtalýda.