Semeıde kóppáterli úıden órt shyǵyp, 11 otbasy baspanasyz qaldy
SEMEI. QazAqparat – Semeı qalasyndaǵy kóppáterli turǵyn úı otqa orandy, dep habarlady QazAqparat tilshisi.
Qalalyq TJB baspasóz qyzmetiniń málimetine súıensek, 20 sáýir túngi saǵat 02.00 shamasynda Melkombınat kóshesindegi ekiqabatty turǵyn úıde órt shyqqany jaıly habar túsken. Anyqtalǵandaı 18 páterli úı tóbesiniń aǵash qurylymdaryn jalyn sharpydy. Saldarynan ekinshi qabattaǵy 4 páterdiń tóbesi qulaǵan. Tilsiz jaýdyń jalpy aýmaǵy 250 sharshy metrdi qurady.
«Sol jerden 39 adam evakýatsııalandy, onyń ishinde 9 bala bar. Zardap shekkender bolǵan joq. Bul úıde 41 adam turady», - dep habarlady vedomstvo ókilderi.
Órt saǵat 05.28-de tolyqtaı sóndirildi. TJB ókilderiniń dereginshe, tilsiz jaýdyń kesirinen qazirgi ýaqytta 11 otbasy baspanasyz qalǵan.
