Semeıde kópqabatty úıge lıft ornatamyn dep kórshilerinen 1 mln teńge jınaǵan alaıaq ustaldy
ShQO Polıtsııa departamenti baspasóz qyzmetiniń málimetine súıensek, 29 jastaǵy áıel adam kórshilerine úıge lıft ornatyp bere alatyndyǵyn aıtyp, aqsha jınastyrǵan. Buǵan sengen turǵyndar oǵan suraǵan somasyn jınap berdi. Alaıda áıel sózinde turmaǵan. Sóıtip, kórshileri Semeı qalalyq PB Áýezov polıtsııa bólimine kelip, aryz túsirdi.
«Tergeý barysynda alaıaqtyń lıft ornatý syltaýymen iri qarajatty ıelengeni anyqtaldy. Osy kúnge deıin ýáde etilgen lıft ornatylmaǵan. Keltirilgen jalpy shyǵyn mólsheri – 1 000 000 teńgeden asady. Jaýap alý kezinde áıel adam zańsyz jolmen tapqan aqshany óz keregine jumsap qoıǵanyn jetkizdi», - dep habarlady vedomstvo ókilderi.
Qazirgi ýaqytta polıtsııa qyzmetkerleri atalǵan fakti boıynsha QR QK-niń 189-baby 1-bóligine sáıkes (senip tapsyrylǵan bóten múlikti ıemdený nemese talan-tarajǵa salý) sotqa deıingi tergeý amaldaryn júrgizýde.