Semeıde kópqabatty úıden órt shyǵyp, 15 adam evakýatsııalandy
SEMEI. QazAqparat – Semeı qalasynda órt shyqqan besqabatty turǵyn úıden 15 adam evakýatsııalandy, dep habarlaıdy QazAqparat tilshisi.
ShQO Tótenshe jaǵdaılar departameti baspasóz qyzmetiniń málimetine súıensek, órt búgin saǵat 03:00-der shamasynda shyqqan. Oqıǵa ornyna kelip jetken órt sóndirýshiler podezderdiń birindegi aǵash esikti jalyn sharpyǵanyn kórdi.
«Tútin tumshalaǵan podezden 15 adam, onyń ishinde 3 bala qaýipsiz jerge kóshirildi. Ózdiginen páterden shyǵa almaı qalǵan 1969 jylǵy áıeldi qutqarýshylar kóterip shyǵardy. Tilsiz jaýdyń jalpy aýmaǵy 4 sharshy metrdi quraǵan», - dep habarlady vedomstvo ókilderi.
Aıta keteıik, aldyn ala málimet boıynsha órttiń shyǵý sebebi – qasaqana órteýden bolýy múmkin.
