Semeıde kópqabatty úı órtenip, bir adam qaza tapty
SEMEI. QazAqparat – Semeı qalasyndaǵy Shúlbi kentinde besqabatty turǵyn úıde órt shyǵyp, bir adam kóz jumǵan, dep habarlaıdy QazAqparat.
ShQO TJD baspasóz qyzmetiniń málimetine súıensek, keshe túnde 101 nómirine habarlasqan turǵyndar Shúlbi kentinde órt shyqqanyn aıtqan. №40 órt sóndirý bólimshesiniń qutqarýshylary birden oqıǵa ornyna attanady. Anyqtalǵandaı, 2-shi yqsham aýdandaǵy besqabatty turǵyn úıdiń bir bólmeli páterinde órt shyǵypty. Aǵash jıhaz qurylymdardy sharpyǵan tilsiz jaýdyń jalpy aýmaǵy - 4 sharshy metr.
«Podezd ishin kók tútin tumshalaǵan. Qutqarýshylar 23 adamdy evakýatsııalady. Órt sóndirý kezinde edennen 1954 jyly týǵan úı ıesiniń jansyz denesi tabyldy», - dep habarlady vedomstvo ókilderi.
Qyzyl jalyn 22 saǵat 38 mınýttyń ishinde tolyqtaı aýyzdyqtaldy. Aldyn ala boljam boıynsha, órttiń shyǵý sebebi - mas kúıinde temeki shegý nemese otty abaısyz paıdalaný.
Aıta ketsek, bul - bıyl Shúlbi kentindegi adam ólimine ákelip soqqan ekinshi órt oqıǵasy. 13 aqpan kúni úı ishinde temeki shekken semeılik kóz jumǵan bolatyn. Osy oraıda TJD turǵyndarǵa órt qaýipsizdigi erejelerin qatań saqtaýdy eskertedi.
