Semeıde kópqabatty turǵyn úıde órt shyǵyp, bir adam kóz jumdy
SEMEI. QazAqparat – Semeı qalasynda kópqabatty turǵyn úıdegi páterlerdiń birin qyzyl jalyn sharpyǵan, dep habarlaıdy QazAqparat.
Qalalyq tótenshe jaǵdaılar basqarmasynyń málimetine súıensek, 6 sáýir kúni Áýezov dańǵylyndaǵy tórtqabatty turǵyn úıde órt shyqqan. Oqıǵa ornyna attanǵan №13 órt sóndirý bóliminiń qyzmetkerleri otqa oranǵan birinshi qabattaǵy páterge bet alady.
«Páter ishindegi aǵash eden, jıhazdar, tereze men esikti qyzyl jalyn sharpyǵan. Tilsiz jaýdyń jalpy aýmaǵy 30 sharty metrdi qurady. Tórgi bólmede ıis tıip esinen aıyrylǵan 1961 jylǵy úı ıesi tabyldy. Órt sóndirýshiler medıtsına qyzmetkerleri kelgenshe oǵan alǵashqy kómek kórsetken. Alaıda áıel aýrýhanaǵa jetpeı, jedel járdem kóliginde qaza boldy», - dep habarlady vedomstvo ókilderi.
Sonymen qatar úı ıesiniń 34 jastaǵy uly jaraqat alǵan. Órt kezinde ol tereze arqyly syrtqa shyǵyp úlgergen, biraq eki tabanyn kúıik shaldy. Aq halattylar kómek kórsetken er adamdy aýrýhanaǵa jatýqyzýdyń qajettiligi bolmady.
Aıta keteıik, tilsiz jaýdy aýyzdyqtaý barysynda órt sóndirýshiler 9 adamdy, onyń ishinde eki balany evakýatsııalaǵan. Sońynan anyqtalǵandaı, sol kúni anasy men balasy úıde ishimdik ishken. Órttiń shyǵý sebebi – otty abaısyz paıdalanýdan bolýy yqtımal. Qazirgi ýaqytta tekserý jumystary jalǵasýda.
