Semeıde kópqabatty úıdegi bir páterden 10 KamAZ qoqys shyǵaryldy
ASTANA. KAZINFORM — Semeıde kópqabatty turǵyn úıdegi qaýipti qoqys úıindisi joıyldy, dep habarlaıdy Abaı oblystyq PD baspasóz qyzmeti.
Semeı qalasynda polıtsııa qyzmetkerlerimen kommýnaldyq qyzmet ókilderi, eriktiler jáne áleýmettik qoldaý uıymdarynyń birigip, kópqabatty turǵyn úıdegi páterlerdiń birin qoqystan tazartý boıynsha aýqymdy jumys júrgizdi.
Tekserýge turǵyndardyń jaǵymsyz ıis, antısanıtarııalyq jaǵdaı jáne órt shyǵý qaýpine baılanysty túsken kóptegen shaǵymy sebep boldy. Oqıǵa ornyna kelgen polıtsııa qyzmetkerleri páterde uzaq ýaqyt boıy qoqys pen qajetsiz zattardyń jınalyp qalǵanyn anyqtady.
Bul is-shara polıtsııadan FSM Social qosymshasy arqyly Semeı qalasy Abaı oblysy KMQK «Otbasy jáne turmystyq zorlyq-zombylyq qurbandaryn qoldaý ortalyǵyna» habarlama túsip, nátıjesinde páterge mobıldik toptar «Jastar Semeı» jáne «Ana úıi» qoǵamdyq qory, Kámeletke tolmaǵandar isteri jónindegi komıssııa músheleri, mektep basshylyǵy jáne Semeı qalasynyń polıtsııa ókilderi kelip, birlesip jumys istedi.
— Páterge kirgen kezde qyzmetkerler bólmelerdiń uzaq jyldar boıy jınalǵan turmystyq qaldyqtar, eski zattar jáne pakettermen toly ekenin anyqtady. Tazalaý jumystaryn uıymdastyrý barysynda páterden shamamen 10 KamAZ kóleminde qoqys shyǵaryldy. Qoqys úıindisi tek páter ıesine ǵana emes, búkil kópqabatty turǵyn úı turǵyndaryna qaýip tóndiretinin kórsetti: órt shyǵý yqtımaldyǵy, ınfektsııanyń taralý qaýpi jáne sanıtarııalyq talaptardyń buzylýy anyq baıqaldy, — delingen habarlamada.
Osy is-sharalardyń nátıjesinde yqtımal tótenshe jaǵdaıdyń aldyn alý, kópqabatty turǵyn úı turǵyndarynyń qaýipsizdigin qamtamasyz etý jáne páterdegi sanıtarlyq ahýaldy qalpyna keltirý múmkin boldy.
Polıtsııa azamattardy ómir men densaýlyǵyna qaýip tóndiretin jaǵdaılardy ýaqytynda habarlaýǵa shaqyryp, sanıtarııalyq talaptardy saqtaýdy eskertedi.
Buǵan deıin Óskemende qoqys tolǵan páter otqa oranǵanyn jazǵanbyz.
Keıinnen páterdiń órtenýine qatysty qylmystyq is qozǵaldy.
