Semeıde kópbalaly otbasylar úshin 10 úı salynyp jatyr

SEMEI. QazAqparat – Semeı qalasyndaǵy Komsomol kentinde kópbalaly otbasylarǵa arnalǵan 10 jeke turǵyn úıdiń qurylysy júrgizilýde, dep habarlaıdy QazAqparat tilshisi.

Qurylysty óz esebinen «Zelenstroı», «Semeı qurylys materıaldary», «Art Stroı Grýpp» jáne «Sanjar» kompanııalary júrgizýde.

Keıin bul úılerdi ákimdik satyp alyp, kezekke sáıkes kópbalaly otbasylarǵa úlestiredi.

«Búginde munda úıler salý, elektr qýatymen jáne sý qubyrymen qamtamasyz etý jumystary júrgizilýde. Kelesi jyly osynda taǵy 120-dan astam úı salý josparlanyp otyr. Bul úıler kópbalaly otbasylarǵa beriledi», - deıdi qalalyq sáýlet jáne qala qurylysy bólimi basshysynyń mindetin atqarýshy Ardaq Isataev.

Kópbalaly januıalar bul úılerdi kezek tártibimen alady. Páterdi bólýmen komıssııa aınalysatyn bolady. Búginde shahar boıynsha páter kezeginde 575 adam tur.