Semeıde kópbalaly ana baspanaly boldy
29 jastaǵy Toǵjan Nurjanqyzy 6 balanyń anasy. Buǵan deıin ol balalarymen apatty jaǵdaıdaǵy jaldamaly úıde turǵan. Sondyqtan jergilikti meshit ımamdarynan kómek suraǵan eken. Al kópbalaly otbasyǵa Almatydaǵy «Haraket» qaıyrymdylyq qory kómek qolyn sozdy. Osylaısha, birneshe jyldan beri baspanaly bolýdy ańsaǵan ananyń armany oryndaldy.
Toǵjannyń balalarynyń úlkeni 9 jasta bolsa, kishkentaıy 1-den asqan. Osy ýaqytqa deıin ol balalaryna berilgen járdemaqyǵa kún kórip kelgen.
«Jaǵdaıymdy kórip, túsinip kómek jasaǵandaryna úlken alǵys bildiremin. Osy ýaqytqa deıin maǵan kómektesken jandar kóp. Solardyń arqasynda osy kúnge jettim. Qazirgi zamanda 6 balamen páter tabýda qıyn. Óıtkeni kóp jer kirgizbeıdi. Aqshany tólemeı ketedi dep qorqady. Biraq men páter jaldap turǵan kezderimde aqsha tólemeı, qashyp ketken kezderim bolmady», - deıdi kópbalaly ana.
Aıta keterligi, «Haraket» qaıyrymdylyq qory qurylǵan 8 aıdyń ishinde elimizde segiz baspanasyzdyń máselesin sheship berdi. Qordyń maqsaty - halyqtyń demeýimen muqtaj jandarǵa, jetim-jesirlerge, múmkindigi shekteýli jandarǵa, kópbalaly, jalǵyzbasty analarǵa úı nemese jer telimin alyp berýge, úı salýyna kómektesý.