Semeıde kontent úshin jol erejesin óreskel buzyp júrgen bloger jaýapqa tartyldy

SEMEI. KAZINFORM – Semeı qalasynda birneshe ret jol erejesin óreskel buzyp, aınalasyna qaýip tóndirgen Toyota Camry avtokóliginiń 22 jastaǵy júrgizýshisi ustaldy.

Belgili bolǵandaı, ol jol erejelerin qasaqana buzyp, ony vıdeoǵa túsirip, TikTok áleýmettik jelisine jarııalap otyrǵan.

- Bloger bir apta ishinde birneshe aýyr quqyqbuzýshylyq jasady. Atap aıtqanda, jyldamdyqty belgilengen shekten asyryp, tórt jolaqty jolda qarsy qozǵalys jolaǵyna shyǵyp, baǵdarshamnyń tyıym salatyn sıgnalyna ótken. Sondaı-aq manevr jasaý qaǵıdalaryn buzyp, kólik júrgizý kezinde qaýipsizdik beldigin taqpaǵan jáne uıaly telefon qoldanǵan, - dep habarlady Abaı oblystyq Polıtsııa departamentinen.

Sonymen qatar avtokólik aldyńǵy memlekettik tirkeý nómirlik belgisinsiz júrgen jáne oǵan paıdalanýǵa tyıym salynǵan arnaıy jaryq qurylǵylary ornatylǵan.

- Atalǵan barlyq quqyqbuzýshylyq boıynsha júrgizýshige qatysty ákimshilik hattamalar toltyryldy. Birqatar derek boıynsha is sotqa joldanady. Er adam kólik basqarý quqyǵynan aıyrylyp, iri kólemde aıyppul tóleýi múmkin, - delingen aqparatta.

Eske salsaq, osyǵan deıin Abaı oblysynda psıhıkalyq aýrýy bar 62 adam kólik aıdap júrgeni jaıly jazǵan edik.