Semeıde Kongress holl salynady, quny — 15 mlrd teńge

ASTANA. KAZINFORM — Semeı qalasynda Kongress holl salýǵa 5,4 gektar jer ýchaskesi anyqtaldy. Bul týraly Mádenıet jáne aqparat mınıstrliginen málim etti.

— Búgingi tańda Semeı qalasynda teatr ǵımaraty (sahnasy, kórermen zaldary, grımerlik, repetıtsııalyq úı-jaılary) jáne materıaldyq tehnıkalyq bazasy (sahnalyq jabdyq, álsiz jaryqtandyrý jáne dybys júıesi, qosymsha tehnologııalardyń jetispeýshiligi) qazirgi zamańǵy talaptarǵa saı kelmeıdi. Teatr ǵımaratynyń máselesin sheshý maqsatynda oblys ákimdigimen «Semeı qalasynda Kongress holl salý» jobasy boıynsha jobalyq-smetalyq qujat daıyndaldy. Kongress holl salýǵa Semeı qalasynyń Zarıa aýdanynda, aýdany 5,4 gektar jer ýchaskesi anyqtaldy, — dep atap ótedi mınıstrilikten agenttik saýalyna oraı.

Vedomstvonyń atap ótýinshe, memlekettik saraptamadan ótý — jer ýchaskelerin alý jáne rásimdeý rásimi aıaqtalǵannan keıin ótkiziledi.

— Jobalyq-smetalyq qujattamany memlekettik saraptamaǵa júkteýdiń josparlanǵan merzimi — 2025 jylǵy 2 toqsany. Qurylys-montajdaý jumystarynyń shamamen alynǵan somasy — 15 mlrd teńge, — dep naqtylaıdy mınıstrlikten.

Esterińizge sala ketsek, Memleket basshysy Qasym-Jomart Toqaev Býrabaıda ótken Ulttyq quryltaıdyń 4-otyrysynda Semeıde bir ǵımaratta úsh birdeı teatr syǵylysyp otyrǵanyn, aımaqtarda teatrlardy salýǵa jáne damytýǵa basa nazar aýdarý kerektigin aıtqan edi.