Semeıde kondýktor aqsha tóleı almaǵan balany qarańǵyda avtobýstan túsirip jibergen

SEMEI. KAZINFORM — Semeı qalasynda ınternet baılanysynyń joqtyǵyna baılanysty aqsha tóleı almaǵan balany avtobýstan túsirip jibergen kondýktor jaýapqa tartyldy. 

Oblystyq Polıtsııa departamenti baspasóz qyzmetiniń málimetine súıensek, polıtsııa qyzmetkerleri Instagram áleýmettik jelisindegi paraqshalardyń birinde jarııalanǵan fakti boıynsha tekseris júrgizdi.

— Belgili bolǵandaı, № 22 avtobýsqa otyrǵan kámelettik jasqa tolmaǵan bala ınternet baılanysynyń joqtyǵyna baılanysty jolaqysyn ýaqtyly tóleı almaǵan. Alaıda baılanystyń qalpyna kelýin kúte turýdy suraǵanyna qaramastan kondýktor ony avtobýstan shyǵýyn talap etip, qarańǵy ýaqytta májbúrli túrde túsirip jibergen, — delingen aqparatta.

Osylaısha, oqýshy ata-anasynyń nemese zańdy ókilderinsiz kóshede jalǵyz qalyp qoıǵan.

— Kondýktor kámeletke tolmaǵan jolaýshyny qoǵamdyq kólikten kúshpen túsirgeni úshin ákimshilik jaýapkershilikke tartyldy. Bul quqyqbuzýshylyq úshin 5 AEK (19 910 teńge) aıyppul qarastyrylǵan. Qazirgi ýaqytta tártip saqshylary tasymaldaýshy kompanııa basshylyǵymen zań talaptaryn saqtaý jáne qyzmet kórsetý sapasyn arttyrý baǵytynda profılaktıkalyq jumys júrgizip jatyr, — delingen aqparatta.

Eske salsaq, osyǵan deıin Almaty mańynda kondýktor júrip bara jatqan avtobýstan qulap, mert bolǵany habarlanǵan.