Semeıde kontsessııalyq joba aıasyndaǵy alǵashqy nysan salynýda
ÓSKEMEN. QazAqparat - Shyǵys Qazaqstanda kontsessııalyq jobalar arqyly ınvestıtsııa tartý jumystary qarqyn ala bastady. Bul jobalarǵa basty kontsessıoner retinde Eýropa damý jáne qaıta qurý banki atsalyspaq, dep habarlaıdy QazAqparat.
ShQO ákiminiń baspasóz qyzmeti Semeıde salynyp jatqan 320 oryndyq balabaqsha Qazaqstandaǵy kontsessııalyq jolmen salynǵan tuńǵysh áleýmettik nysan bolatynyn habarlady. Qurylys bıyl jazda aıaqtalýy kerek. Nysan alǵashqy jyldarda kontsessıonerdiń menshiginde bolady. Kontsessıoner menshik ıesi retinde memleketten tapsyrys alyp, qurylysqa ketken shyǵyndy belglengen merzim ishinde qaıtarýǵa kúsh salady. Osydan keıin ǵana balabaqsha memleket balansyna kóshedi.
Osyǵan uqsas shart boıynsha oblysta 2 medıtsınalyq nysan salynbaq. Onyń biri - Óskemendegi 300 oryndyq kópsalaly aýrýhana bolsa, ekinshisi - Semeıdegi 200 oryndyq balalar aýrýhanasy. Zyrıan qalasyndaǵy jylý qazandyǵyna qos týrbınaly generator ornatý jobasy da kontsessııalyq jolmen júzege asýy tıis.
- Ótken jyly oblysymyz birinshi bolyp tórt kontsessııalyq kelisimshartqa qol qoıdy. Shart boıynsha memleketten jer jáne qajetti ınfraqurylym beriledi. Tıisti qujattar resimdelgen, endi kontsesıonerge bilek sybanyp jumys isteý ǵana qaldy, - deıdi oblys ákimi Danıal Ahmetov.
2018 jyly Shyǵysta kontsessııalyq shart negizinde taǵy 14 jobany iske asyrý josparlanǵan. Onyń ishinde quny 5 mlrd teńgeden asatyn Óskemenniń jylý júıesin jańǵyrtý jobasy bar. Atalmysh somanyń 3 mlrd teńgesin Eýropa damý jáne qaıta qurý banki bóletin bolyp kelisken. Joba boıynsha 2 shaqyrymnan astam jylý qubyry jańartylyp, Menovnoe kentin ortalyqtandyrylǵan jelige qosý kózdelgen. Buǵan qosa 11 sorǵy stansasy men 10 qazandyqty kúrdeli jóndeý josparlanyp otyr.
Óńir úshin eń iri kontsessıoner Eýropa damý jáne qaıta qurý banki bolatyn túri bar. Jergilikti ákimdik pen bank ókilderi 88 joba boıynsha kelissózder júrgizýde. Olardyń jalpy quny 227 mlrd teńgege jetip otyr.
