Semeıde kommýnaldyq qyzmetter kúsheıtilgen rejımge kóshti
SEMEI. QazAqparat - Semeılik qutqarýshylar eki aýysymda jumys isteýge kóshti. Sebebi, sınoptıkter 16-17 naýryzda Shyǵys Qazaqstan oblysynda sý kólemi artatynyn málimdedi. Osyǵan baılanysty qazir qalada qaýyrt jumystar atqarylyp jatyr, dep habarlaıdy QazAqparat.
Semeı qalasy turǵyn úı-kommýnaldyq sharýashylyǵy bóliminiń basshysy Marat Alenovtyń aıtýynsha, qazir barlyq aryq júıeleri men sýaǵarlar kóktemge daıyn. Berilgen jumystardy qalany kógaldandyrý, abattandyrýmen aınalysatyn «Semeı» kásiporyny iske asyrǵan. Jalpy bıyl qalanyń aryq júıesin tazartýǵa bıýdjetten 27 mln teńge bólingen.
«Aldyn-alý jumystarynyń arqasynda Krasnyı kordon, Dalnıı, Mırnyı kentteri men Shyǵys saıajaıy sý basý qaýpinen qutyldy deýge bolady. Aryq júıesindegi shóp pen qamystar shabylyp, arnalardy tazartý men tereńdetý, muzdy oıý jumystary júrgizildi. Bul erigen sýdyń asyp-tasýyna jol bermeıdi»,-dedi Marat Alenov.
Qazir atalǵan kásiporyn sý tasqyny qaýpine baılanysty 2 aýysymda jumys isteýde. Qaýipti aýdandarda barlyǵy 5 birlik tehnıka men 25-ten asa adam jumys istep jatyr. Degenmen barlyǵy qalanyń kommýnaldyq qyzmetterine baılanysty emes ekenin de atap ótti M. Alenov.
Sebebi, aryq júıeleriniń turmystyq qoqys qaldyqtaryna tolýyna turǵyndardyń da yqpaly bar kórinedi.
«Sonymen qatar jaǵdaıdy paıdalana otyryp, aryq júıesi ótip jatqan aýdandarda turatyn turǵyndarǵa qoqys pen kúldi aryqqa tastamaýdy suraımyn. Bul áreketter aryq júıesiniń tolýy men tasý qaýpin ákeledi»,-deıd ol.
Qazirgi tańda qalany sý basý qaýpi joq. Degenmen sınoptıkter taratqan aqparattan keıin qalanyń kommýnaldyq qyzmetteri áreketterin kúsheıtti.
