Semeıde kómirge telefon arqyly tapsyrys berýge bolady
SEMEI. QazAqparat - Semeıde jeke sektorda turatyn turǵyndardyń tizimi jasalyp jatyr. Osylaısha jergilikti bılik kómirdi zańsyz satýmen aınalysatyn kásipkerlerdi baqylaýǵa alyp, olarǵa jol bermeýdi kózdep otyr, dep habarlaıdy QazAqparat.
Qalada kómir alypsatarlarymen qatań kúres bastaldy. Qala ákimi Ermak Sálimov bastaǵan bir top jergilikti bılik ókilderi kómir satatyn oryndardy aralap, tekserý jumystaryn júrgizdi. Óıtkeni, qymbatqa satatyn alypsatarlar kóbeıip keledi. Eger kómirdiń tonnasy 7 400 teńge bolsa, deldaldar tonnasyn 10 myńǵa deıin saýdalaıdy. Sondyqtan olarǵa jol bermeý maqsatynda endi turǵyndar qatty otynǵa telefon arqyly tapsyrys bere alady. Úıge deıin jetkizip berý quny 8 600 teńge.
«Jumyspen qamtý jáne áleýmettik baǵdarlamalar bólimi, kásiporyndar, temirjol bólimimen turǵyndardyń tizimin aldyq. Osy arqyly biz turǵyndarmen kezdesip, olarǵa qansha kómir kerek ekenin anyqtaımyz. Sodan keıin otyndy úıine deıin jetkizip beretin bolady», - dedi qala basshysy.
Búginde Semeıde qatty otyn satatyn 3 oryn belgilengen. Bul oryndarǵa kúnine «Qarajyra» kómir ken ornynan táýligine 20 vagon kómir jetkizilýi kerek. Biraq belgisiz sebeptermen táýligine tek 3 vagon kómir jetkizilýde. Qala ákimi bul máseleni anyqtaıtynyn jetkizdi.
Taǵy bir másele jetkizilgen kómirdi turǵyndardan buryn alypsatarlar qoldy etedi. Olar jeke menshik kólikterimen kómir satatyn oryndarǵa tańerteńmen kezekke turyp, satyp alyp ketedi. Sodan keıin ústinen baǵa qosyp, turǵyndarǵa qymbatqa satady. Qala ákimi zańsyz jeke kásiprkerlikpen aınalysyp júrgendermen kezdesip, jumystarynyń zań talaptaryna qaıshy ekenin eskertti.
