Semeıde kómirge kezek kútkender tóbeles shyǵaryp, er adam kóz jumdy
SEMEI. QazAqparat - Semeıde kómir úshin talas bolyp, saldarynan kezekte turǵandar arasynda janjal týǵan. Onyń sońy adam ólimimen aıaqtaldy, dep habarlaıdy QazAqparat.
Oqıǵa 13 qarasha kúni Semeı qalasynan 110 shaqyrym jerde ornalasqan «Qarajyra» kómir ken ornynda bolǵan.
Qatty otyn úshin japatarmaǵaı jantalasyp talasqan azamattar arasynda janjal týǵan. Sońynda 33 jastaǵy qala turǵyny kezekte turǵan azamattyń qolynan kóz jumǵan. Kýágerlerdiń sózinshe, ashýǵa býlyqqan azamat ony jaýyzdyqpen óltirgen.
Polıtsııa qyzmetkerleriniń jedel izdeý sharalarynyń nátıjesinde izi sýymaı atalǵan qylmysty jasady degen kúdikten 1994 jyly týǵan Semeı qalasynyń turǵyny ustaldy.
«Stepnoı kenti turǵynynyń qaıtys bolýyna baılanysty búgingi kúni QR Qylmystyq kodeksiniń 106-baby, 3-tarmaǵy (Densaýlyqqa qasaqana aýyr zııan keltirý)boıynsha sotqa deıingi tergeý amaldary bastaldy. Qazirgi tańda kúdikti ýaqytsha qamaýǵa alynǵan», - dedi Semeı qalasy polıtsııa basqarmasynyń baspasóz hatshysy Elýbek Ospanov.
