Semeıde «Qoljetimdi sport» jobasy qolǵa alyndy
SEMEI. QazAqparat – Semeı qalasynda halyqty sportqa baýlý úshin «Qoljetimdi sport» jobasy júzege asyrylyp jatyr, dep habarlaıdy QazAqparat tilshisi.
Qala ákimdiginiń málimetine súıensek, «Qoljetimdi sport» jobasynyń maqsaty – turǵyndardy sportpen aınalysýǵa shaqyrý, salaýatty ómir saltyn nasıhattaý. Nıet bildirýshiler 5 sport túri boıynsha tegin úıirmege qatysyp, jattyǵa alady. Atap aıtqanda, karate, skandınavııalyq serýen, jeńil atletıka, fıtnes jáne ústel tennısi.
«Úıirmelerde joǵary bilikti nusqaýshylar men bapkerler jumys isteıdi. Joba 22 sáýirde bastaldy. Qazir qaladaǵy tıisti oryndar belgilengen. Keıbir jas shekteýleri bar. Mysaly, karate úıirmesine 7 jastan, skandınavııalyq serýenge, fıtneske jáne ústel tennısine 18 jastan bastap jazylýǵa bolady», - dedi qalalyq sport bóliminiń bas mamany Baqytjan Egizbaev.
Esterińizge sala ketsek, osyǵan deıin Semeıde voleıboldan áıelder arasynda Azııa chempıonaty ótken bolatyn.
