Semeıde kolledjdegi býllıng faktisi boıynsha sot isi qaraldy
SEMEI. KAZINFORM — Semeı qalasynyń mamandandyrylǵan aýdanaralyq ákimshilik quqyqbuzýshylyqtar jónindegi soty kolledjdegi býllıng faktisi boıynsha isti qarady.
2010 jyly týǵan, kolledjdiń birinshi kýrsynda oqıtyn jasóspirim jataqhanada birge turatyn basqa stýdentke júıeli túrde tıisip kelgen.
— Atap aıtqanda, kámeletke tolmaǵan jasóspirim jábirlenýshige kúsh qoldanyp, ony tunshyqtyrǵan. Bul jaǵdaı beınejazbaǵa túsirilip, qorlaıtyn sózdermen birge ortaq chatta taratylǵan. Sondaı-aq aýdıtorııadaǵy beınebaqylaý kameralaryna B.-nyń K. otyrǵan jaqqa partany ıtergen sáti túsip qalǵan, — dep habarlady Abaı oblystyq sotynyń baspasóz qyzmetinen.
Sot kámeletke tolmaǵannyń áreketterinde Ákimshilik quqyq buzýshylyq týraly kodekstiń 127-2-babynyń 3-bóligine (kámeletke tolmaǵanǵa qatysty býllıng) sáıkes quqyq buzýshylyq belgileri bar degen qorytyndyǵa keldi.
— Jasóspirimniń áreketi úshin jaýapkershilik ata-anasyna júkteletindikten, is onyń anasyna qatysty qaraldy. Sot qaýlysymen jasóspirimniń anasyna 10 AEK mólsherinde aıyppul salyndy, — delingen aqparatta.
Eske salsaq, osyǵan deıin Jambyl oblysynda oqýshylar býllıngine qatysy bar úsh ata-anaǵa aıyppul salynǵany habarlanǵan.
