Semeıde qoqys óńdeıtin zaýyt salynady
SEMEI. QazAqparat – Semeı qalasynda tamyz aıynyń sońyna qaraı qoqys óńdeıtin zaýyt salynady, dep habarlaıdy QazAqparat tilshisi.
Ótken jyldyń qarasha aıynda QR Premer-Mınıstri Asqar Mamınniń 2025 jylǵa deıin el aýmaǵynda 6 qoqys óńdeý zaýytyn salý týraly tapsyrmasy aıasynda qazaqstandyq delegatsııa Gretsııaǵa sapar jasady. Onda «SABO S.A» atty kompanııanyń basqarýshy dırektory Dımıtrıs Kılıarıspen kelissózder júrgizilgen.
Sapar qorytyndysy boıynsha taraptar Semeı, Óskemen jáne Aqtóbe qalalaryndaǵy qoqys óńdeý zaýyttary úshin qatty turmystyq qaldyqtardy suryptaý jáne qaıta óńdeý boıynsha avtomattandyrylǵan jelilerdi satyp alý týraly kelisimge qol qoıdy.
Búgin Semeı qalasyna grek delegatsııasy jumys saparymen kelip, atqarylyp jatqan sharalardyń qarqynymen tanysty.
«Aldaǵy ýaqytta barlyq qaldyqtar suryptalatyn bolady. Qazir buǵan qajetti ǵımarat salynyp jatyr. Jumysty iske qosýdy 29 tamyzǵa josparlap otyrmyz», - dedi «Operator» JShS basqarma tóraǵasy Medet Qumarǵalıev.
Qala boıynsha qabyldaý pýnktterin ornalastyrýǵa jaýapty uıym – «Hazıpov» JK. Kásiporyn tamyz aıynda shyny qabyldaıtyn 10 qabyldaý pýnktin iske qosýy tıis.
Óz kezeginde «SABO S.A» grek kompanııasynyń dırektory Dımıtrıs Kılıarıs osy seriktestiktiń mańyzdylyǵyn atap ótti.
«Qoqysty qaıta óńdeýge nazar aýdarý óte mańyzdy. Atap aıtqanda, bilim berý salasynda ekologııa taqyrybynyń qalys qalmaǵany qýantady. Shynynda da, balalyq shaqtan bastap sanany ózgertip, ekologııalyq mádenıetti úıretý kerek», – dedi Dımıtrıs Kılıarıs.
Kezdesý sońynda delegatsııa músheleri polıgon ornyna baryp, júrgizilip jatqan jumystardy baqylap, aldaǵy josparlardy talqylady.
