Semeıde kóktemgi sý tasqynynyń aldyn alý sharalary pysyqtaldy
Jıynǵa ShQO prokýrory Qusaıyn Igembaev, oblys ákiminiń orynbasary Baqytjan Baıahmetov, Semeı qalasynyń ákimi Ermak Sálimov, TJD, «Qazgıdromet» jáne «Ertis basseıni ınspektsııasy» RMK ókilderi qatysty. Shara barysynda sý tasqynyna oraı birlesken is qımyldar daıyndyǵy sóz boldy.
«Osydan eki jyl burynǵy qateliktiń qaıtalanýyna jol bermeýimiz kerek. Ol kezde tasqynnyń saldarynan myńdaǵan úıler buzylyp, úsh myńnan astam adam evakýtsııalanǵan. Prokýratýra qylmystyq is qozǵap, kináliler jaýapqa tartylǵan bolatyn»,- dedi Qusaıyn Igembaev.
Qala ákimi Ermak Sálimovtyń aıtýynsha, osy jyly sý tasqynynyń aldyn alý sharalaryna 944,5 mln teńge qarastyrylǵan. Turǵyn-úı kommýnaldyq sharýashylyq bóliminde sý ótkizetin kanaldardy aǵymdaǵy jóndeý men kútip ustaýǵa 46 mıllıon teńgeden astam qarajat bólingen. Semeıdegi osyndaı kanaldardyń uzyndyǵy - 62 shaqyrym.
«Búgingi kúni aryqtyń barlyǵy tazartyldy, jumys shtattyq rejımde júrýde. Jaǵalaýdy bekitý úshin jobalyq-smetalyq qujattama jasalǵan. Joba saraptamaǵa jiberilip, tıisti qarajat bólindi. Búgingi kúni jeke sektordyń 55 kóshesinen 300 myń tekshe metr qar shyǵarylǵan. Qalǵan 5 kóshedegi jumysty naýryzdyń 20-na deıin aıaqtaýdy josparlap otyrmyz», - dedi shahar basshysy.
