Semeıde kóktaıǵaqtan 83 jastaǵy qarııa qulap, kóz jumdy
SEMEI. QazAqparat - Semeıde keshe túnnen beri jaýǵan jańbyr qala kóshelerin kóktaıǵaqqa aınaldyrdy. Saldarynan bir adam kóz jumdy, dep habarlaıdy QazAqparat.
Keshe keshten beri qalada qatty jel soǵyp, qar aralas jańbyr jaýdy. Saldarynan qala kósheleri kóktaıǵaqqa aınaldy. Tipti búgin tańerten 83 jastaǵy qarııa qulap, mert boldy.
Oqys oqıǵa shamamen tańǵy saǵat 6-da úıiniń aýlasynda bolǵan. Dalaǵa shyqqan qarııanyń baıqaýsyzda aıaǵy taıyp qulaǵan.
Oqıǵa ornyna jedel járdem qyzmeti jetkenshe qarııa jan tásilim etipti. Dárigerler qatty qulaǵandyqtan bas súıegine qatty zaqym kelgenin aıtty.
Búgin tańerteńnen beri dárigerler kómegine aıaq-qoly synǵan 10-ǵa jýyq adam júgengen. Jedel medıtsınadyq járdem aýrýhanasynyń travmotologııalyq pýnkt bóliminiń meńgerýshisi Qumar Seıilhanovtiń aıtýynsha, qazir ártúrli jaraqattarmen túsken naýqastar sany kóbeıgen.
«Naýqastardyń sany azaımaı, kerisinshe, ulǵaıyp jatyr. Munyń barlyǵy aýa raıynyń qolaısyzdyǵyna baılanysty. Kelip túskenderdiń barlyǵyna jedel kómek kórsetýdemiz. Jáne qatty qulaǵan jaǵdaıda birden jedel járdem shaqyrý kerek. Negizi turǵyndardan múmkindiginde úıde otyrýǵa keńes beremin», - deıdi Qumar Seıilhanov.
