Semeıde qoqys jáshiginen jańa týǵan náresteniń denesi tabyldy

SEMEI. KAZINFORM — Semeı qalasynda qoqys jáshiginen shaqalaqtyń denesiniń tabylýyna baılanysty qylmystyq is qozǵaldy. 

Abaı oblysy polıtsııa departamenti baspasóz qyzmetiniń málimetine súıensek, 3 aqpanda Áýezov polıtsııa bólimine Semeıde qoqys jáshiginen súlgige oralǵan jańa týǵan náresteniń máıiti tabylǵany týraly habar tústi.

— Oqıǵa ornyna jedel-tergeý tobynyń qyzmetkerleri shuǵyl kelip jetti. Alǵashqy is-sharalar barysynda úı jaǵdaıynda bosanǵan 20 jastaǵy qyz anyqtaldy. Onyń aıtýynsha, náreste tirshilik belgilerinsiz týǵan, — delingen aqparatta.

Sondaı-aq sotqa deıingi tergeý barysynda náresteniń máıitin konteınerge tastaǵan qala turǵyny anyqtaldy.

— Atalǵan derek boıynsha sotqa deıingi tergeý bastaldy. Náresteniń máıiti saraptamaǵa jiberildi, onyń nátıjeleri boıynsha protsessýaldyq sheshim qabyldanyp, oqıǵaǵa qatysy bar eki tulǵanyń áreketterine quqyqtyq baǵa beriledi, — delingen habarlamada.

Eske salsaq, osyǵan deıin Shyǵys Qazaqstanda náreste ólimi kóbeıgeni habarlanǵan.