Semeıde qoqys tasıtyn kólik dóńgelegi asfalttyń astyna túsip ketti

SEMEI. KAZINFORM - Semeı qalasyndaǵy Zarıadnaıa men Dýlatov kósheleriniń qıylysynda asfalt opyrylyp jatyr.

Búgin Zarıadnaıa kóshesinen kele jatqan qoqys tasıtyn kólik baǵdarshamǵa toqtaǵan. Biraq ary qaraı júre almaı qaldy. Sebebi asfalttyń beti kóliktiń salmaǵyn kótere almaı opyrylyp tústi. Júk kóliginiń artqy oń jaq dóńgelegi asfalttyń astyna túsip ketken.

- Kenetten bir qatty soqqyny sezdik. Abyroı bolǵanda, eshkim zardap shekpedi. Biz birden ákimdikke, túrli qyzmetterge habarlastyq. Biraq eshkim jaýap bermedi. Tek jýrnalıstermen baılanysqa shyqqannan keıin, 1 jarym saǵatqa jýyq ýaqyttan soń patrýldik polıtseıler keldi. Keıin ákimdiktiń TÚKSh bólimi men «Vodokanal» mamandary jetti. Kran arqyly kólikti alyp shyqtyq, - deıdi qoqys tasıtyn kóliktiń júrgizýshisi Ivan Vasılev.

Turǵyndardyń aıtýynsha, asfalt kóliktiń ǵana emes, adamnyń salmaǵynan da opyrylyp ketedi. Osyndaı sátti vıdeoǵa túsirgen kýáger aıaǵynyń astynda shuńqyrlar paıda bolǵanyn aıtty.

Qala ákimdiginen máseleniń sheshimin tabatynyn málim etti.

- Dýlatov pen Zarıadnaıa kósheleriniń qıylysyndaǵy jaǵdaı baqylaýǵa alyndy. Qajetti eskertý belgilerin ornatý jumystary júrgizilip jatyr. Mamandar jol jamylǵysynyń jaǵdaıyn baǵalap, aýmaqty tekserip jatyr. Opyrylǵan jer jedel qalypqa keltirile bastady. Jumys barysy týraly qosymsha aqparat beriledi, - dep habarlady ákimdiktiń baspasóz qyzmetinen.

Eske salsaq, buǵan deıin Óskemende poıyz ben avtobýs soqtyǵysa jazdaǵany habarlanǵan.