Semeıde qoǵamdyq keńistikter men saıabaqtardyń sany artyp keledi
SEMEI. KAZINFORM – Abaı oblysynyń ákimi Berik Ýálı Semeı qalasyndaǵy «ıÝnost» shaǵyn aýdanynda salynyp jatqan jańa qoǵamdyq keńistiktiń qurylys barysymen tanysty.
Demalys ornynyń qurylysy eki kezeńmen júzege asyrylyp jatyr. Qoǵamdyq keńistiktiń jalpy uzyndyǵy 1 shaqyrymnan asady, aýmaǵy 52 620 sharshy metrdi quraıdy. Kógaldandyrý jumystary aıasynda 355 qylqan japyraqty, 788 japyraqty aǵash, 8484 sándik buta jáne 27 408 kópjyldyq gúl otyrǵyzý josparlanǵan.
Qoǵamdyq keńistik aýmaǵynda kishi sáýlet nysandary, oryndyqtar, qoqys jáshikteri men jaryq baǵandary ornatylady. Sondaı-aq, fýtbol, basketbol, Workout jáne balalar oıyn alańdary, turǵyndar men qonaqtarǵa arnalǵan demalys aımaqtary, jasyl jelekterdi úzdiksiz sýmen qamtamasyz etetin rezervýar da qarastyrylǵan. Qurylys jumystary tolyq aıaqtalǵan soń bul aýmaq qalalyqtardyń súıikti demalys ornyna aınalmaq.
Aımaq basshysy merdiger uıym ókilderine jumysty sapaly ári ýaqtyly aıaqtaýdy tapsyrdy.
«Qalany abattandyrý baǵytynda júıeli jumystar júrgizilip jatyr. «ıÝnost» shaǵyn aýdanynda salynyp jatqan jańa qoǵamdyq keńistiktiń birinshi kezeńi aıaqtalýǵa jaqyn. Kóktemde kelgenimde bul mańdy sý basyp jatqan, balshyq edi. Qazir jańa keıipke engen. Turǵyndardyń demalýyna, halyqtyń serýendeýine, balalarǵa arnalǵan jaqsy qoǵamdyq keńistik bolady. Oıyn, sport alańdary bar. Bul yqsham aýdanda mundaı demalys orny buryn bolmaǵan. Al ekinshi kezeń kelesi jyly kóktemde bastalady. Qalada osyndaı demalys oryndaryn kóbeıtemiz», – dedi oblys ákimi.
Jergilikti turǵyndar saıabaq qurylysyna rızashylyqtaryn jetkizdi.
«Barlyǵy óte jaqsy jasalyp jatyr. Eń bastysy – sapaly. Buryn bul jerdiń bári batpaq bolyp jatatyn. Ózim osy jerde turamyn, kún saıyn atqarylyp jatqan jumysty kórip júremin. Jaqynda Qaraǵaıly yqsham aýdanyndaǵy jańa saıabaqty da baryp kórdik. Shynynda da, óte ádemi ári zamanaýı túrde salynǵan. Qalamyzdyń kórkeıip kele jatqanyna qýanyshtymyz», – dedi «ıÝnost» shaǵyn aýdanynyń turǵyny Asylbek Álimbaı.
Semeıde jańa qoǵamdyq keńistikterdiń sany kóbeıip keledi. Jaqynda Respýblıka kúnine oraı Qaraǵaıly yqsham aýdanynda jańa saıabaq paıdalanýǵa berildi. Aýmaǵy shamamen 53 myń sharshy metrdi quraıtyn saıabaq tolyq abattandyrylyp, myńǵa jýyq qaraǵaı men shyrsha kóshetteri, 9 500-den astam sándik butalar jáne 8 000-ǵa jýyq kópjyldyq gúlder egildi. Sondaı-aq, onda serýen joldary, demalys aımaqtary, sahna jáne mádenı-kópshilik is-sharalarǵa arnalǵan ashyq alańdar salyndy.
