Semeıde «Qyzyl kitap betterin paraqtaý» eko-aktsııasy ótti
SEMEI. KAZINFORM – Semeı qalasynda «Qyzyl kitap betterin paraqtaý» atty ekologııalyq aktsııa uıymdastyryldy.
Semeıde «Qyzyl kitap betterin paraqtaý» eko-aktsııasy ótti.
Sharany «Semeı ormany» memlekettik orman tabıǵı rezervaty qalalyq ishki saıasat bólimimen birlese «Taza Qazaqstan» jáne «Parkter marshy» aktsııalary aıasynda uıymdastyrdy.
«Ortalyq saıabaqta turǵyndar Qyzyl kitapqa engen sırek ósimdiktermen jáne janýarlarmen tanysýǵa múmkindik aldy. Sonymen qatar Abaı atyndaǵy oblystyq kitaphana uıymdastyrǵan taqyryptyq kórmeni tamashalaýǵa múmkindik jasaldy», - dep habarlady Abaı oblysy ákimdiginen.
Aktsııanyń negizgi maqsaty – turǵyndar nazaryn qorǵalatyn tabıǵı aýmaqtardyń máselesine aýdarý, qoryqtardy saqtaý men damytýǵa naqty kómek kórsetý, halyqtyń jabaıy tabıǵatqa oń kózqarasyn qalyptastyrý.
«2024 jyly «Semeı ormany» memlekettik orman tabıǵı rezervatynda aýqymdy túrde kóshetterdi otyrǵyzý jumystary josparlanǵan. 6 100 gektar jerge 28 mıllıon 700 myń aǵash otyrǵyzylady dep kútilýde. Bul naýqan eki kezeńde júredi. Kóshetterdiń 5 000 gektardan astamy kóktemde, al qalǵan 961 gektary kúzde otyrǵyzylady», - delingen aqparatta.
