Semeıde kishkentaı qyzdy qutqarǵan er adamnyń ózi sýǵa ketti
SEMEI. QazAqparat – Semeıde Ertis ózeninde balany qutqarmaq bolǵan jigit ózi sýǵa ketti, dep habarlaıdy QazAqparat qalalyq tótenshe jaǵdaılar basqarmasyna silteme jasap.
TJB-ǵa 23 shilde kúni saǵat 16:17-de «101» dıspetcher pýltine «Holodnyı klıých» aýdanynda er adamnyń Ertis ózenine batyp ketkeni týraly habar kelip tústi.
«Oqıǵa ornyna Semeı qalasynyń №7 qutqarý bólimshesiniń 2 adamnan turatyn jeke quramy qaıyqpen bardy. Kýágerlerdiń aıtýynsha, eń aldymen kishkentaı qyz sýǵa batqan, er adam oǵan kómekke umtylǵan. Ol qyzdy qutqaryp úlgergen, biraq ózi batyp ketken. Áýezov polıtsııa bólimi kezekshisiniń aıtýynsha, belgisiz er adamnyń denesin sýdan onyń týystary shyǵaryp alǵan», - dep atap ótti TJB-da.
Sýǵa batqan 35 jastaǵy er adam sol ýaqytta Ertis ózeniniń jaǵasynda óz otbasymen bolǵan.
Budan bólek, «101» dıspetcher pýltine Bobrovka saıajaı alqaby aýdanynda bir adamnyń sýǵa ketkeni týraly taǵy bir habar kelip túsken.
«Polıtsııanyń aıtýynsha, máıitti eki jas adam shyǵaryp alǵan», - dedi TJB-da.
Sýǵa batqan er adam 1980 jyly týǵan.
