Semeıde kesteden aýytqyǵan tasymaldaýshylarǵa aıyppul salynady
ÓSKEMEN. QazAqparat - Semeı qalasynda qoǵamdyq jolaýshylar kóliginiń jumysy keste boıynsha qatań júrgiziledi. Kesteden aýytqyǵan jaǵdaıda aıyppul sanktsııalary qoldanylatyn bolady. Mundaı tapsyrmany qala basshysyna ShQO ákimi Danıal Ahmetov búgingi jınalysta berdi, dep habarlaıdy «QazAqparat» HAA tilshisi oblys ákimdiginiń baspasóz qyzmetine silteme jasap.
Buryn oblys ákimi Semeıge jasaǵan jumys sapary kezinde qoǵamdyq kóliktiń jumysyn synǵa alǵan edi. Ol qala basshysyna osy jaǵdaıdy qolǵa alýyn tapsyrǵan bolatyn.
Semeı qalasynyń ákimi Ermaq Sálimov habarlaǵandaı, úsh marshrýttyń qyzmet kórsetýi boıynsha kelisilgen mindettemelerdi buzǵany úshin tasymaldaýshy sotqa berilgen.
Óńir basshysy avtobýs qozǵalystarynyń kestesi buzylǵan jaǵdaıda, qoldanylatyn jaza ádisterin jasaýdy tapsyrdy.
«Ár marshrýtty baqylaýǵa alyp, onyń qozǵalý kestesin kórip otyrýymyz kerek. Aıyppul sanktsııasy júıesi kerek», - dep túsindirdi Danıal Ahmetov.
Ahmetov Semeıge jasaıtyn kelesi jumys saparynda onyń tapsyrmasynyń qaı deńgeıde oryndalyp jatqandyǵyn mindetti túrde tekserýge ýáde etti.
