Semeıde «Keleshek mektepteri» jobasy aıasynda ashyq esik kúni ótti
SEMEI. KAZINFORM — Semeı qalasynyń Vodnyı kentinde 600 oryndyq jańa mektep ǵımaratynda ashyq esik kúni uıymdastyryldy. Іs-shara «Keleshek mektepteri» ulttyq jobasy aıasynda salynyp jatqan bilim ordasynyń múmkindikterin tanystyrý maqsatynda ótti.
Jańa úlgidegi úsh qabatty № 52 mektep 2025–2026 oqý jylynda ashylady. Bul — joba boıynsha Abaı oblysyndaǵy úshinshi, Semeı qalasyndaǵy ekinshi mektep. Buǵan deıin Qaraǵaıly shaǵynaýdanynda 1200 oryndyq, al Besqaraǵaı aýdanynda 300 oryndyq mektep paıdalanýǵa berilgen.
Ashyq esik kúnine 100-den astam ata-ana, 60-qa jýyq oqýshy, muǵalimder, buqaralyq aqparat quraldary ókilderi, blogerler, sondaı-aq oblystyq jáne qalalyq bilim bólimderiniń mamandary qatysty. Qonaqtar sport jáne akt zaly, ashana, horeografııa zaly, bastaýysh jáne arnaıy pán kabınetteri, STEM-zerthanalar, robototehnıka kabıneti, kovorkıng aımaqtary, kitaphana jáne oqý zalyn aralady. Mektep aýlasynda fýtbol, voleıbol, basketbol alańdary men júgirý jolaqtary salynǵan.
— Bastaýysh jáne orta býyn synyptary bólek bloktarda ornalasyp, bastaýysh oqýshylaryna qaýipsiz ári jaıly orta qamtamasyz etilgen. Ár kabınet ınteraktıvti taqta men jańa kompıýterlermen jabdyqtalǵan. Robototehnıka, 3D modeldeý jáne mýltımedıalyq úıirmeler balalardyń tsıfrlyq saýattylyǵyn arttyrýǵa múmkindik beredi, — dedi № 52 jalpy orta bilim beretin mektep dırektorynyń mindetin atqarýshy Tilek Sapyshev.
Mektepte 28 zamanaýı oqý kabıneti, fızıka, hımııa, bıologııa zerthanalary, ınformatıka jáne robototehnıka kabınetteri, grafıka jáne modeldeý bólmesi, aǵash jáne metall óńdeý tsehtary, aspazdyq jáne tigin sheberhanalary ornalasady. Oqý protsesine 30 ınteraktıvti panel, noýtbýkter, statsıonarlyq kompıýterler men prınterler qoıylady.
Inklıýzıvti bilim berý talaptaryna saı ǵımarat lıft, pandýstar, taktıldi jolaqtar jáne arnaıy sanıtarlyq toraptarmen jabdyqtalǵan. Qaýipsizdik maqsatynda beınebaqylaý júıesi, týrnıketter, órt dabyly, 19 apattyq shyǵý esigi jáne 7 baspaldaq qarastyrylǵan.
Ata-analar men oqýshylar jańa mekteptiń keń ári jaryq kabınetterin joǵary baǵalap, mundaı ashyq esik kúniniń oblys aýmaǵynda alǵash ret ótkizilip otyrǵanyn atap ótti.
— Eki nemeremdi osy «Keleshek mektebinde» oqytpaqpyn. Qurylysy sándi, zaman talabyna saı salynǵan. Kabınetterdi aralap kórdik, bári jaryq ári keń. 1–4 synyp oqýshylary ashanada tegin tamaqtanady. Akt zaly da óte jaqsy. Bastaýysh synyptar shyǵys blogynda, orta synyptar ekinshi qabatta, joǵary synyptar joǵarǵy qabatta oqıdy. Kabınet qabyrǵalaryndaǵy formýlalar men naqyl sózder oqýshylarǵa shabyt beredi, — dedi mektep oqýshysynyń ata-anasy Úzim Ramazanqyzy.
Jalpy, «Keleshek mektepteri» jobasy aıasynda óńirde bes jańa bilim berý nysany salynady. Aıagóz aýdanyndaǵy 600 oryndyq mektep bıyl kúzde ashylsa, Semeıdiń Shyǵys kentinde 300 oryndyq mekteptiń qurylysy bıyl bastalady.
Aıta ketelik Batys Qazaqstan oblysynyń ákimi salynyp jatqan mektepterdi teksergen edi.