Semeıde qazan aıyna deıin jylytý júıesindegi olqylyqtar túzetilmek
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov aımaqtyń jylytý maýsymyna daıyndyǵy máseleleri boıynsha keńes ótkizdi, dep habarlaıdy QazAqparat tilshisi.
Búginde oblysta barlyq jumys belgilengen kestege saı júrgizilýde. Turǵyn úı-kommýnaldyq qyzmet salasy nysandarynyń ázirligi 88%-y qurap otyr. Al bilim nysandary 100%-ǵa daıyn. Oblysqa qajetti kómir qory – 3,9 mln tonna. Qazir onyń 97%-y bar.
«Semeıdegi «Teplokommýnenergo» kásipornyna qatysty eki úlken másele tur. Biri kásiporynnyń jylý energııasyna shyǵyndary, al ekinshisi kólemi 1,6 mlrd teńge bolatyn abonentterdiń bereshegi. Máselen, jylýǵa qaryz adamdardyń arasynda zańsyz jylý qoldanǵan abonentter de bar. Bir sózben aıtqanda, jylý energııasyn ashyq túrde urlaǵan. Búginde bul máseleni Semeı qalasynyń ákimi jiti baqylaýyna aldy. Buǵan qosa, Rıdderdegi jylý elektr stansasynyń daıyndyǵyna qatysty kúmán týyndaýda. Sondyqtan, taıaý kúnderi arnaıy komıssııa jylý ortalyǵyn tekseredi», - dedi oblys ákimi Danıal Ahmetov.
Semeı, Kýrchatov, Óskemen jáne Rıdder qalalarynda kópqabatty úılerdi jylytý maýsymyna daıyndaý boıynsha qarqyndy jumys jalǵasýda. Semeıdegi kúrdeli nysandardan basqanyń bári 1 qyrkúıekte tolyqtaı daıyn bolady. Sondaı-aq qazan aıyna deıin Semeıdegi jylytý júıesine qatysty olqylyqtar túzetilmek.
«Barlyq qala, aýdan ákimderi belgilengen kestege sáıkes jumys isteýi tıis. Naqty merzimder men sharalar jospary bar. Qıyndyq týǵyzǵan máseleler bolsa, jumys tártibine sáıkes sheshiledi. Jalpy, jylytý maýsymyna arnalǵan daıyndyq esh kedergisiz júrgizilýde», - dedi aımaq basshysy.
