Semeıde qazaqstandyq fýtbol murajaıy jańa jádigerlermen tolyqty
SEMEI. QazAqparat - Semeıde qazaqstandyq fýtbol murajaıy jańa jádigerlermen tolyqty, dep habarlaıdy QazAqparat qalanyń aqparattyq ortalyǵyna silteme jasap.
«10 jeltoqsan – Dúnıejúzilik fýtbol kúni. Ataýly kúnniń qurmetine Qazaqstan fýtbolynyń murajaıynda jańa jádigerler tanystyryldy», delingen habarlamada.
Murajaıǵa 2002 jylǵy «Elimaı» komandasynyń qoltańbasy bar dop qoıyldy, ataqty «Qaırat» oıynshysy Tımýr Segizbaevtyń aty jazylǵan fýtbolkany sportshynyń otbasy tapsyrdy.
«Tselınnıktiń» 70-80 jyldardaǵy oıynshysy, SSSR sport sheberi, qazir QFF balalar-jasóspirimder fýtbol departamentiniń mamany Vladımır Pavlıýk «Tselınnık» oıynshylarynyń qoltańbasy bar 1991 jylǵy dopty, «Dınamodan» «Jeńiske» deıin« atty kitabyn murajaıǵa syıǵa tartty.
QFF ulttyq qurama komandalar departamentiniń basshysy Ivan Azovskıı shara kezinde Qazaqstan quramasynyń qorǵaýshysy Sergeı Maloıdyń oıyn fýtbolkasyn tanystyrdy.
Murajaıdyń kelýshileri Qazaqstan quramasynyń qurylý tarıhymen de tanysa aldy. Tusaýkeserde quramanyń formasy kórsetildi. Sondaı-aq, »Elimaı« quramynda Qazaqstannyń eki dúrkin chempıony bolǵan Konstantın Frıdental qurama jeıdesin syıǵa tartty.
Endi qazaqstandyq fýtboldyń rekordshysy Andreı Pınchýkovtyń aıaq kıimi de murajaıdan oryn tapty.
»Vostok« stadıonynyń burynǵy dırektory, qazirgi »Ýstınka+« gazetiniń sport sholýshysy Valerıı Chernov murajaıǵa baǵdarlamalar, gazet toptamasyn syılady.
Aıta keterligi, murajaı 2017 jyldan bastap jumys isteıdi. Jyl saıyn Qazaqstannyń túkpir-túkpirinen jáne basqa elderden kelgen jas sportshylar Semeı qalasyndaǵy týrnırge kelgende Qazaqstan fýtbolynyń murajaıyna barady. Jalpy murajaı ashylǵannan beri ony 1 200-den astam adam tamashalaǵan.
