Semeıde qaıta qurylǵan «Elimaı» fýtbol klýby Birinshi lıgaǵa qatysýǵa nıetti

SEMEI. QazAqparat – Semeı qalasynda qaıta qurylǵan «Elimaı» fýtbol klýby Birinshi lıgaǵa qatysýǵa nıetti, dep habarlaıdy QazAqparat tilshisi

Abaı oblysy ákimdiginiń málimetine súıensek, Semeıde qala kúnine oraı balalar arasynda fýtboldan týrnır ótti. Shara aldynda Qazaqstan fýtbol federatsııasynyń prezıdenti Ádilet Bármenqulovtyń atyna bıyl qaıta jandanǵan «Elimaı» fýtbol klýbyn Birinshi lıgaǵa qatystyrý týraly ótinishke qol qoıyldy.

Týrnırden bólek, balalar úshin tegin dastarhan jaıylyp, akvagrım, fotoaımaq pen qyzyqty baıqaýlar uıymdastyryldy. Bultsyz ári jyly kúnde balalar dop teýip, erekshe demalyp qaıtty.

«Qala halqy osyndaı sharalardy saǵyndy. Balalar – bizdiń basty baılyǵymyz. Bul týrnır endi jyl saıyn ótkizilip turady», - dedi aımaq basshysy Nurlan Uranhaev.

Sondaı-aq sharaǵa Semeı fýtbolynyń aty ańyzǵa aınalǵan shákirti Samat Smaqov qatysty.