Semeıde kásipkerlik nysandaryna reıd júrgizilýde
SEMEI. QazAqparat – Semeıde koronavırýs ınfektsııasynyń taralýyna jol bermeý maqsatynda kásipkerlik nysandaryna reıd júrgizile bastady, dep habarlaıdy QazAqparat tilshisi qalalyq aqparattyq ortalyqtyń baspasóz qyzmetine silteme jasap.
Aqparattyq ortalyqtyń habarlaýynsha, monıtorıng toby kásipkerler men jalpy halyq ishinde tekserý jumystaryn júrgizedi. Maska men áleýmettik qashyqtyq tártibi men sanıtarııalyq-gıgıenalyq talaptardyń saqtalýyn qadaǵalaıdy. Reıd aıasynda mamandar halyq kóp jınalatyn nysandardy tekserip, birqatar ereje buzýshylyqtardy anyqtady. Atap aıtqanda kóbinde kezdesetin ereje buzýshylyqtardyń sanatyna medıtsınalyq maskanyń taǵylmaýyn atap ótýge bolady. Satýshylar da, kelýshiler de maska rejımin saqtaı bermeıdi.
«Jabyq nysandarda adamdar maska kıip, qolǵap kıip júrýi kerek. Qazaqstanda koronavırýsty juqtyrýshylar áli de tirkelip jatqandyqtan halyqqa eskertý jumystary júrgiziledi. Kásipkerlik nysandarynda mindetti túrde antıseptıkter men dezınfektsııalyq kilemsheler bolýy kerek», - dep habarlady ShQO taýarlar men qyzmetterdiń sapasy men qaýipsizdigin baqylaý departamentiniń bas mamany Gúlbarshyn Baıǵozına.
Reıd barysynda halyqqa aqparattyq túsindirý jumystary júrgizildi.
Rýslan Shaqabaev
