Semeıde qarjy pıramıdasyn qurǵan alaıaqqa sot úkimi shyqty
SEMEI. QazAqparat - Semeıde «Qarjy ınvest» ınvestıtsııalyq kompanııasynyń dırektoryna qatysty sot úkimi shyqty, dep habarlaıdy QazAqparat.
Eske sala keteıik, 2018 jyldyń 14 aqpany kúni seriktestik dırektoryna qatysty QR Qylmystyq Kodeksiniń 217-baby (Qarjylyq (ınvestıtsııalyq) pıramıdany qurý jáne oǵan basshylyq etý) jáne 190-baby (Alaıaqtyq) boıynsha qylmystyq is qozǵalǵan bolatyn.
Sebebi, «Qarjy ınvest» JShS 3 jyl ishinde turǵyndardyń senimine kirip, sońynda san soqtyryp ketti. Kompanııadan aqshasyn ústemelep alýǵa qyzyqqan adamdar bankterden tipti 1 mln teńgege deıin nesıe rásimdep, oılanbastan ótkize bergen. Alǵan aqshanyń 40 paıyzyn kompanııaǵa berse, qalǵany óz qaltasynda qalǵan. Al rásimdegen nesıeni kompanııa tólep otyrǵan. Alǵashynda turǵyndardyń nesıesin ýaqytymen tólep, senimge kirgen. Turǵyndar aldanǵandaryn keıin bank nesıeni tóleýdi talap etken ýaqytta bir-aq bilgen.
Qylmystyq isti qaraǵan Semeı qalasynyń №2 soty qarjy pıramıdasynyń dırektory Tahırovaǵa qatysty sot úkimin shyǵardy. Oǵan 7 jylǵa bas bostandyǵynan aıyrý jazasy taǵaıyndaldy. Biraq, sot onyń kámelettik jasqa tolmaǵan 4 balasy baryn eskerip, qaýlyny 5 jylǵa keıin shegerdi.
«Sonymen qatar, sot qaýlysymen Tahırova 7 jylǵa deıin kommertsııalyq jáne kommertsııalyq emes uıymdarda laýazymdy qyzmet atqarý quqyǵynan aıyryldy. Jáne jeke jer ýchaskesi men turǵyn úıine, bank shotyndaǵy barlyq qarajatyna, jeke múlkine tyıym salyndy. Sotta ol óz kinásin tolyq moıyndady. Kámeletke tolmaǵan balalary men buryn sotty bolmaǵany eskerildi. Jáne ol búgingi kúni 114 japa shegýshiniń 54-ine qarjysyn qaıtaryp berdi. Biraq, shyǵarylǵan qaýly áli zańdy kúshine engen joq»,-deıdi Semeı qalasynyń №2 sotynyń tóraǵasy Janat Abenova.
