Semeıde qarjy pıramıdasy dırektorynyń jazasy 6 aıǵa uzartyldy
SEMEI. QazAqparat - Semeıde «Qarjy ınvest LTD» JShS ınvestıtsııalyq kompanııasynyń dırektoryna qatysty taǵy úkim shyqty. Sot onyń jazasyn 6 aıǵa uzartty, dep habarlaıdy QazAqparat.
Semeıde qarjy pıramıdasyna baılanysty aıyptalǵan ınvestıtsııalyq kompanııanyń dırektory Dana Tahırovaǵa qatysty taǵy sot otyrysy ótti. Aǵymdaǵy jyldyń 19 shildesinde Semeı qalalyq № 2 soty ony 7 jylǵa bas bostandyǵynan aıyryp, japa shekken 176 adamnyń 54-ine 27 mln teńgeni óndirip berý týraly sheshim shyǵarǵan.
Alaıda alaıaq áıeldiń arbaýyna túsken qala turǵyndarynan kelip túsken shaǵym toqtamaǵan. Shamamen 300 adam aryz bergen. Alaıda sot otyrysy kezinde olardyń tek 244-i ǵana qajetti qujattaryn kórsetip, ózderiniń shyǵyndaryn dáleldeı aldy. Shyǵyn kólemi 42 mln 354 myń teńge.
Qylmystyq isti qaraǵan Semeı qalasynyń №2 soty qarjy pıramıdasynyń dırektory D. Tahırovaǵa ekinshi sot úkimin shyǵardy.
«Buǵan deıin 7 jylǵa bas bostandyǵynan aıyrylǵan jazasynyń ústine taǵy 6 aı qosyldy. Biraq sot onyń 4 kámelettik jasqa tolmaǵan balasy baryn eskerip, qaýlyny 5 jylǵa keıinge shegerdi»,-dedi sottyń baspasóz qyzmetinen.
Eske sala keteıik, 2018 jyldyń 14 aqpany kúni seriktestik dırektoryna qatysty QR Qylmystyq Kodeksiniń 217 baby (Qarjylyq (ınvestıtsııalyq) pıramıdany qurý jáne oǵan basshylyq etý) jáne 190 baby (Alaıaqtyq) boıynsha qylmystyq is qozǵalǵan bolatyn.
Atap aıtqanda, «Qarjy ınvest» JShS 3 jyl ishinde turǵyndardyń senimine kirip, sońynda san soqtyryp ketken. Kompanııadan aqshasyn ústemelep alýǵa qyzyqqan adamdar bankterden tipti 1 mln teńgege deıin nesıe rásimdep, oılanbastan ótkize bergen. Alǵan aqshanyń 40 paıyzyn kompanııaǵa berse, qalǵany óz qaltasynda qalǵan. Al rásimdegen nesıeni kompanııa tólep otyrǵan. Alǵashynda turǵyndardyń nesıesin ýaqytymen tólep, senimge kirgen. Turǵyndar aldanǵandaryn keıin bank nesıeni tóleýdi talap etken ýaqytta bir-aq bilgen.
