Semeıde qaraýsyz jatqan 45 ıesiz qudyq jabyldy
SEMEI. QazAqparat - Semeıde qaraýsyz jatqan káriz qudyqtary turǵyndarǵa qaýip tóndirip tur. Sebebi, beti ashyq qudyqtardyń ıesi de joq bolyp shyqty, dep habarlaıdy QazAqparat.
Aıta keterligi, qala ákiminiń eseptik kezdesýinde turǵyndar ashyq ári qaraýsyz jatqan sý qubyrlary men káriz qudyqtarynyń turǵyndar men kólikter úshin qaýipti ekenin aıtqan bolatyn. Osyǵan baılanysty ákimniń tapsyrmasymen arnaıy komıssııa qurylyp, qaraýsyz jatqan qudyqtarǵa tekserý júrgizdi. Nátıjesinde 45 ıesiz qudyq anyqtaldy.
«Ázirge komıssııa anyqtaǵan 45 ıesiz qudyqqa qatysty qaýipsizdik sharalaryn júzege asyrdy. Inventarızatsııadan soń, qaraýsyz qalǵan qudyqtar «Zelenstroı» memlekettik kommýnaldyq kásipornyna tapsyrylady. Qarjy qajet bolsa bólemiz. Másele kóp uzamaı sheshiledi. Bul baǵyttaǵy jumystar áli de jalǵasatyn bolady» - dedi qala ákimi Ermak Sálimov.
Mamandar qaraýsyz jatqan ıesiz qudyqtardyń áli de bar ekenin alǵa tartady. Sondyqtan, olardy anyqtaý jumystary jalǵasady. Óıtkeni, ondaı ashyq-shashyq qudyqtar adam ómirine qaýipti. Mysaly, byltyr qarasha aıynda 6 jasar bala ıtimen serýendeýge shyǵyp, sol kúıi úıine oralmaǵan edi. Al denesin ashyq jatqan káriz qudyǵynan óli tapqan bolatyn. Biraq qaıǵyly oqıǵadan keıin qudyqtyń qaı mekemeniń balansynda ekeni anyqtalmady.
Belgili bolǵandaı, Semeıde eń kóp káriz qudyǵy «Qazaqtelekomǵa» tıesili eken.
