Semeıde karantınge jatqyzylǵan OAR azamatynan koronavırýs tabylmady
SEMEI. QazAqparat – Tumaýratyp aýrýhanaǵa jetkizilgen OAR turǵynynan koronavırýs rastalǵan joq, dep habarlaıdy QazAqparat tilshisi.
«Jedel járdem arqyly ınfektsııalyq statsıonarǵa jetkizilgen OAR azamatynyń test nátıjeleri alyndy. COVID 2019 vırýsyna tapsyrylǵan test teris nátıje kórsetkenin habarlaımyz», - dedi oblystyq ákimdikte.
Ákimdik qazirgi ýaqytta Shyǵys Qazaqstan oblysynda koronavırýs joq ekenin atap ótti.
Eske sala keteıik, keshe Semeıde 71 jastaǵy Ońtústik Afrıka Respýblıkasynyń azamaty dene qyzýy kóterilip, tumaýratyp aýrýhanaǵa jetkizilgen bolatyn. Ol ShQO-ǵa tehnıkalyq jınalysqa Dýbaı jáne Nur-Sultan arqyly tranzıtpen kelgen.
Áreket etý algorıtmine sáıkes, jedel járdem stansasynyń qyzmetkerleri patsıentti qorǵanysh kostıýmderi arqyly ınfektsııalyq statsıonarǵa jetkizgen.
