Semeıde karantın kezinde ınternet-alaıaqtyq kóbeıdi

SEMEI. QazAqparat – Semeı qalasynda karantın kezinde alaıaqtyq faktileri jıilep ketti, dep habarlaıdy QazAqparat tilshisi.

Qalalyq Aqparat ortalyǵynda ótken baspasóz brıfınginde Semeı qalalyq polıtsııa basqarmasy krımınaldyq polıtsııa bóliminiń bastyǵy Danııar Qazkeev málim etkendeı, karantın ýaqytynda dúıim jurt qashyqtan saýda jasaýǵa kóshkende ınternet-alaıaqtardyń sany kúrt artqan. Jyl basynan beri Semeıde osyndaı 115 alaıaqtyq faktisi tirkeldi. Onyń 78-i ashylsa, 37-i boıynsha jedel-izdestirý sharalary jalǵasýda.

Kóp jaǵdaıda alaıaqtar ártúrli saıttarǵa jarnama ornalastyryp, ınternet paıdalanýshylardan aldyn ala tólem jiberýdi suraıdy. Olar elimizdiń túkpir-túkpirinde ǵana emes, basqa elderde otyryp-aq «jumys isteıdi». Máselen, 13 adamdy Reseı Federatsııasyndaǵy ınternet-alaıaqtar tuzaqqa túsirgen.

«Alaıaqtardyń arbaýyna ilikkenderdiń sanyn azaıtý úshin halyq arasynda túsindirý jumystary júrgizilýde. Tótenshe jaǵdaı kezinde kópshiliktiń úıde otyryp onlaın qyzmetterdi paıdalanǵany belgili. Al alaıaqtar bolsa áýeli tanymal saıttar arqyly jyljymaıtyn múlik nemese avtokólik satatyndyǵyn habarlaǵan. Odan keıin qyzyǵýshylyq tanytqandarǵa basqa qalada ekendigin aıtyp, aldyn ala tólemdi, jeke kýálikti nemese bank derekterin jiberýdi suraǵan. Osyndaı qylmystardy ashý qıynǵa soǵady, sondaı-aq keltirilgen materıaldyq shyǵynnyń da qaıtarylýy ekitalaı», - deıdi Danııar Qazkeev.