Semeıde qar shyǵarýǵa qosymsha qarajat qajet
SEMEI. QazAqparat - Kommýnaldyq sala qyzmetkerleriniń sózinshe, bıylǵy túsken qar mólsheri ótken jylmen salystyrǵanda áldeqaıda mol. Sondyqtan qalany qardan tazalaý úshin qosymsha qarajat qajet, dep habarlaıdy QazAqparat.
Semeıdiń kommýnaldyq qyzmetkerleri kúsheıtilgen tártipte jumys istep, qala kóshelerin qardan tazalap jatyr. Qys mezgili bastalǵaly qaladan 35 myń tekshe metr qar shyǵaryldy. Semeı qalasy ákiminiń orynbasary Nıkolaı Ýshakovtyń sózinshe, shamamen 80 myń tekshe metr qar shyǵarylýy kerek. Sondyqtan qar shyǵarý jumystaryna qosymsha qarajat qajet.
«Biz bıylǵy qys mezgilinde qaladan shamamen 44 myń tekshe metr qar shyǵarýdy josparlaǵan edik. Alaıda qardyń kóp túsýine baılanysty qalada taǵy shyǵarý kerek 40 myń tekshe metr qar bar. Bul tek 25 kóshedegi qar mólsheri. Qazir qosymsha qarajat bólý úshin bıýdjettik ótinim ázirlep jatyrmyz»,-dedi Nıkolaı Ýshakov.
Búgingi tańda qar shyǵarý qarqyndy júrgizilýde. Eger bul jumystar qazirden bastalmasa, jeke sektordaǵy úılerdi sý basý qaýpi bar. Sondyqtan qaladaǵy Lesnaıa, 1-shi lınııa, 2-shi lınııa, Aıagýzskaıa, Podgornaıa, Aeroportovskaıa, Prıstanskaıa, Parhomenko, Aımaýytov sııaqty birqatar qaýipti kóshelerdegi qar shyǵaryldy. Endi Morozov kóshesi aýdanyndaǵy joldar jáne Dalnıaıa kóshesi qardan tazalanyp jatyr. Jalpy qar shyǵarý jumystaryna 6 júk tıegish tehnıka men 8 samosval jumyldyrylǵan.
