Semeıde qańtardaǵy jappaı tártipsizdikke qatysqan úsh adam 4 jylǵa sottaldy

SEMEI. QazAqparat – Semeı qalasynda qańtar oqıǵasynda jappaı tártipsizdikke qatysqan 3 adam sottaldy, dep habarlaıdy QazAqparat tilshisi.

Qańtar oqıǵasynda jappaı tártipsizdikke qatysqan 3 adamǵa sot úkimi shyqty.

Olar QR Qylmystyq Kodeksiniń 272-baby 2-bóligi (jappaı tártipsizdikke qatysý), 380-baby 1-bóligi (bılik ókiline qatysty kúsh qoldaný) boıynsha qylmys jasaǵan.

Semeı qalasynyń №2 soty kúdiktiler men Shyǵys Qazaqstan oblysynyń prokýratýrasy arasynda jasalǵan protsestik kelisimge sáıkes, er adamdardyń istegen isine tolyq ókingenin jáne kelgen zalaldy ótegenin eskerip, olardy 4 jyl merzimge bas bostandyǵynan aıyrdy.

Úkim áli zańdy kúshine engen joq.

«Sottalǵandardyń kinási qylmys jasalǵan jerdegi beınejazbalarmen, kýágerlerdiń sózimen jáne alynǵan zattaı aıǵaqtarmen dáleldenedi. Qalǵan qylmystyq ister óndiriste jáne aıaqtalý satysynda. Aıǵaq-dálel jınaý boıynsha tıisti sharalar júrgizilip jatyr», - dep habarlady ShQO prokýratýrasynyń baspasóz qyzmeti.