Semeıde balalardy zorlaǵan stýdent ómir boıyna bas bostandyǵynan aıyryldy
SEMEI. KAZINFORM – Abaı oblysynyń sotynda habarlaǵandaı, Semeıde eki kámeletke tolmaǵan balany zorlaǵany úshin zań fakýltetiniń stýdentine úkim shyǵaryldy.
Abaı oblysynyń qylmystyq ister jónindegi mamandandyrylǵan aýdanaralyq sotynda jabyq sot otyrysynda zorlaý (QK-niń 120-babynyń 4-bóligi), sondaı-aq jas balalarǵa qatysty seksýaldyq sıpattaǵy zorlyq-zombylyq áreketteri (QK-niń 121-babynyń 4-bóligi) faktisi boıynsha 2004 jyly týǵan zań fakýltetiniń stýdentine qatysty qylmystyq isti qarady.
Aıyptaý qorytyndysyna sáıkes, sottalýshynyń Semeı qalasynda 2022 jyldyń mamyry men 2025 jyldyń qańtar aılarynda 12 jáne 13 jastaǵy jas balalarǵa qatysty jasaǵan qylmysy anyqtaldy. Alǵashqy epızod kezinde aıyptalýshynyń jasy 18-de bolǵan. Sot barysynda stýdent óz kinásin moıyndamady jáne ózin aqtaýdy surady.
Kámeletke tolmaǵandarǵa zorlyq áreketteri úshin er adam ómir boıyna bas bostandyǵynan aıyryldy. Sondaı-aq ol pedagogıkalyq jáne kámeletke tolmaǵandarmen baılanysty qyzmetterdi atqarý quqyǵynan aıyryldy.
Úkim zańdy kúshine engen joq.
Aıta ketelik Aqtóbede mektepterdi attestatsııadan ótkizý kezinde para alǵan basshy isti bolyp jatyr.