Semeıde qalany damytýdyń keshendi jospary iske asyrylyp jatyr
SEMEI. QazAqparat – Semeıde qalany damytýdyń keshendi jospary iske asyrylýda, dep habarlaıdy QazAqparat tilshisi.
Memleket basshysynyń tapsyrmasy boıynsha byltyr Semeıdi damytýdyń 2020-2025 jyldarǵa arnalǵan keshendi jospary bekitilgen. Soǵan sáıkes, shaharda ómirlik mańyzy bar salalardy qamtıtyn 7 baǵyt boıynsha 56 jobany iske asyrý josparlanǵan. Bul týraly onlaın formatta ótken baspasóz konferentsııasynda qala ákiminiń orynbasary Qanat Ádilbaev málimdedi.
«Semeıdi damytýǵa 260,2 mlrd teńge bólingen. Osy soma aldaǵy ýaqytta aıtarlyqtaı ósedi. Sebebi baǵdarlamada Qaraǵaıly yqsham aýdanyndaǵy jańa ınnovatsııalyq mektep qurylysynyń jáne Znamenka, Qaraýyl, Kýrchatov jáne basqa da mańyzdy joldardy baılanystyratyn Almaty tasjoly boıyndaǵy aınalmaly jol qurylysynyń quny qarastyrylmaǵan. Jobalyq smetalyq qujattamalar kelesi jyly daıyn bolady. Al jumysty bastaý 2022 jylǵa josparlanǵan», - deıdi ol.
Bıyl baǵdarlamany iske asyrýǵa 58 mlrd teńge bólindi. Jeti mádenı, eki áleýmettik, toǵyz bilim berý nysanyna jóndeý jumystary júrgizilgen. Sońǵy jyldary bilim berý mekemelerin jóndeýge 1,5 mln teńge jumsalǵan edi. Al osy jyly 1 mlrd teńgeden artyq qarajat jumyldyryldy. Barlyq mektepterde derlik aǵymdy jáne kúrdeli jóndeý júrgizildi, – deıdi Qanat Ádilbaev.
Keshendi josparǵa sáıkes, Shyǵys kentinde 1200 orynǵa arnalǵan jalpy bilim beretin mektep boı kótermek. Sonymen qatar 2020 jyly jańa radıologııalyq ortalyqty paıdalanýǵa berý kózdelip otyr. Joba quny 6,5 mlrd teńgeni quraıdy.
Qala ákimi orynbasarynyń aıtýynsha, bıyl Semeıdegi 33 kósheniń joly jóndeýden ótti. Respýblıkalyq bıýdjet esebinen «Semeı-Qaınar» tasjolyna ortasha jóndeý júrgizildi. Kóshelerdi jaryqtandyrý boıynsha da birqatar shara atqarylǵan. Búginde Boztaev kóshesi boıyna 484 energııa únemdeıtin shamdar ornatyldy. Taǵy 253 sham Qabanbaı batyr kóshesi boıyna qoıylmaq.
