Semeıde qala kúnine oraı 20 otbasyǵa turǵyn úı kilti tabystaldy
Semeı qalasynyń ákimi Nurbol Nursaǵatov qala kúnin merekeleý qarsańynda memlekettik turǵyn úı qorynda «Kópbalaly otbasy» sanaty boıynsha kezekte turǵan 20 otbasyna jeke turǵyn úı kiltin tabystady, dep habarlaıdy QazAqparat.
Qala ákimdigi baspasóz qyzmetiniń málimetinshe, bul – satyp alý quqyǵynsyz jaldamaly turǵyn úıler.
«Búgin 20 otbasy Ushaqtar kentindegi Arhat kóshesindegi úılerden baspanaly boldy. Maýsym aıynda 37 otbasy óz qonys toıyn toılaǵan bolatyn. Baspana ıelerin osyndaı aıtýly kúnmen shyn júrekten quttyqtaımyn! Jańa úıler berekeli bolyp, barsha shańyraqqa qýanysh ákelsin!» - dedi qala ákimi Nurbol Nursaǵatov.
Osy jyldyń qyrkúıek aıynyń sońyna deıin taǵy 32 kópbalaly otbasy baspanaly bolmaq.
Semeı qalasy boıynsha úı kezegine 13 000-nan astam qala turǵyny tirkelgen.
