Semeıde Qabdesh Jumadilovtiń 90 jyldyǵyna arnalǵan ádebı-sazdy kesh ótti
SEMEI. KAZINFORM – Semeı qalasyndaǵy Abaı atyndaǵy qazaq mýzykalyq-drama teatrynda Qazaqstannyń Halyq jazýshysy, Memlekettik syılyqtyń laýreaty Qabdesh Jumadilovtiń 90 jyldyǵyna arnalǵan «Dáýirdiń dara qalamgeri» atty ádebı-sazdy eske alý keshi ótti.
Taǵylymdy sharaǵa zııaly qaýym ókilderi, aqyn-jazýshylar, mádenıet jáne óner qaıratkerleri qatysty.
Kesh barysynda sóz sóılegen Abaı oblysynyń ákimi Berik Ýálı kórnekti qalamgerdiń qazaq ádebıetindegi orny men ult rýhanııatyna qosqan úlesin atap ótti.
– Prezıdentimiz Qasym-Jomart Kemeluly Toqaev: «Kitapqumarlyq – jaqsy qasıet. Shyn máninde, ozyq oıly ult bolýdyń eń tóte joly – kitap oqý» dep atap ótken bolatyn. Bul sózdiń mańyzy búgingi basqosýda erekshe sezildi. Ómir joly kúrespen bastalyp, keıin ult taǵdyrymen bite qaınasqan sóz zergeri shyǵarmalarynda tarıhı ádilettilik máselelerin, Atamekenge degen saǵynyshty, eldik pen erkindik muratyn tereń sýrettedi. Qalamgerdiń «Qazdar qaıtyp barady», «Kókeıkesti», «Baqyt jolynda», «Daraboz» sekildi shyǵarmalary qazaq ádebıetiniń altyn qorynan berik oryn aldy, – dedi óńir basshysy.
Ákim jazýshynyń shyǵarmashylyq murasynyń mańyzyna da toqtaldy.
– Ásirese qazaq kóshi men ult taǵdyryn arqaý etken «Sońǵy kósh» dılogııasy jazýshynyń shyǵarmashylyq bıigin aıqyndaǵan qundy týyndy retinde baǵalandy. «Óldi deýge bola ma, aıtyńdarshy, ólmeıtuǵyn artynda sóz qaldyrǵan» dep Uly Abaı aıtqandaı, ystyq qaırat, nurly aqyl, jyly júrekti boıyna jıǵan dara daryn ıesiniń baı murasy, eldik muratqa adal ǵumyry halqymyzben birge jasaı beredi. Rýhanııatymyzdyń shamshyraǵyna aınalǵan Qabdesh Jumadilovtiń esimi el jadynda máńgi saqtalady, – dedi Berik Ýálı.
Shara barysynda Qazaqstan Jazýshylar odaǵy basqarmasy tóraǵasynyń orynbasary Ǵalym Qalıbek sóz sóılep, qalamgerdiń otbasy múshelerine jáne oqyrmandaryna izgi tilegin jetkizdi.
Jazýshynyń mereıtoıyna oraı oblysta birqatar mádenı jáne ǵylymı is-shara uıymdastyryldy. Atap aıtqanda, Úrjar aýdanynda «Dáýirimizdiń daraboz jazýshysy» atty ǵylymı-praktıkalyq konferentsııa ótip, Semeıdegi Abaı kitaphanasynda «Taǵdyry ultpen úndesken daraboz jazýshy» atty eske alý keshi uıymdastyryldy.
Kesh aıasynda jazýshynyń ómiri men shyǵarmashylyǵyna arnalǵan teatrlandyrylǵan qoıylym sahnalanyp, Qazaqstannyń Halyq ártisteri Seken Turysbek pen Maıra Іlııasova, dástúrli ánshiler Erkin Shúkiman men Dinıslambek Jaılaýbaı, Qazaqstannyń eńbek sińirgen qaıratkeri Mádına Sádýaqasova jáne jergilikti ónerpazdar óner kórsetti.
Qabdesh Jumadilov uzaq jyldar boıy «Qazaq ádebıeti» gazetinde, «Jazýshy» baspasynda jáne Memlekettik baspalar komıtetinde qyzmet atqaryp, qazaq ádebıetiniń damýyna eleýli úles qosty.
