Semeıde eki kósheniń qıylysynda qoǵamdyq keńistik paıda bolady
SEMEI. KAZINFORM – Shahardyń eń basty dańǵyldarynyń biri sanalatyn Shákárim men Qabanbaı batyr kósheleriniń qıylysynda qoǵamdyq keńistik paıda bolady. Bul týraly búgin qala ákimi Nurbol Nursaǵatov málimdedi.
«Búgin qala basshysy Nurbol Nursaǵatov merdigerlik uıym ókilderimen atalǵan aýmaqqa baryp, qoǵamdyq keńistikti abattandyrý máselelerin talqylady. Qala ákimi qoǵamdyq keńistikti jaılastyrý kezinde aǵashtardy shabýǵa bolmaıtyndyǵyn, toǵaılarǵa arnaıy qyrqý jumystary júrgizý kerektigin atap ótti. Sondaı-aq, qıylysta ornalasqan úılerdiń qasbetterin syrlaýdy, temir konstrýktsııalardy demontajdaýdy tapsyrdy», - delingen habarlamada.
Jumys toby № 1emhana aldyndaǵy alańǵa bardy. Atalǵan aýmaqta dárigerler saıabaǵy abattandyrylýda. Merdigerlik uıym jumysqa tolyǵymen kiristi. Skverda tematıkalyq shaǵyn arhıtektýralyq nysandar, oryndyqtar, jaryqtandyrýlar, qoqys jáshikterin ornatý josparlanǵan.
