Semeıde iri kınoteatrlardyń biri jabyldy
SEMEI. QazAqparat – Semeıde iri kınoteatrlardyń biri - «Eńlik-Kebek» jabyldy, dep habarlaıdy QazAqparat qalalyq aqparat ortalyǵyna silteme jasap.
Mekemedegilerdiń aıtýynsha, áleýmettik jelilerde «Eńlik-Kebek» kınoteatrynyń jabylyp, ǵımarat Ámire Qashaýbaev atyndaǵy oblystyq fılarmonııaǵa beriletini týraly aqparat paıda boldy.
Mádenıet bóliminiń túsindirýinshe, ShQO mádenıet, muraǵattar jáne qujattama basqarmasy ıeligindegi «Eńlik-Kebek» kınoteatry 2004 jyly «Mýnıra» JShS-ne 15 jylǵa keıinnen satyp alý quqyǵynsyz senimgerlik basqarýǵa berilgen. Ótken jyldyń jeltoqsan aıynda senimgerlik basqarý shartynyń merzimi aıaqtaldy. JShS shartty uzartýǵa nıet bildirmedi.
ShQO ákimdiginiń 2017 jyldyń 15 naýryzdaǵy №65 qaýlysyna sáıkes, kınoteatrdy taratý týraly sheshim qabyldandy. Qazir QR Azamattyq kodeksiniń 50-babyna sáıkes, kınoteatrdy taratý jumysy júrip jatyr.
«Eńlik-Kebek» ornalasqan ǵımarat oblystyq kommýnaldyq menshik ıeliginde. Ázirge kınoteatr ǵımaratynyń kimge beriletini belgisiz. Ǵımarattyń saqtalýyna ýaqytsha fılarmonııa jaýap beredi» dep tolyqtyrdy aqparat ortalyǵy ókilderi.
