Semeıde iri kásiporyndarda vaktsınatsııa pýnkteri ashyldy
SEMEI. QazAqparat – Semeı qalasynda 10 myńǵa jýyq adamǵa koronavırýsqa qarsy vaktsına salyndy, dep habarlaıdy QazAqparat tilshisi.
Osy jyldyń 1 aqpanynan bastap elimizde COVID-19 ınfektsııasyna qarsy erikti vaktsınatsııa bastalǵan bolatyn. Búgingi tańda Semeı turǵyndary arasynda ekpe saldyryp jatqandar az emes. Bul jaıly onlaın formatta ótken baspasóz máslıhatynda shahar ákiminiń orynbasary Aıdar Sadyrbaev málim etti.
«Qala boıynsha 10 myńǵa jýyq adam reseılik «Spýtnık V» vaktsınasynyń birinshi komponentin aldy. Erteń QR Densaýlyq saqtaý mınıstrliginiń bekitilgen kestesine sáıkes, vaktsınanyń kezekti dozasynyń jetkizilýin kútip otyrmyz. Vaktsına alǵysy kelgen azamattar turǵylyqty mekenjaıy boıynsha emhanaǵa nemese Egov portaly arqyly ótinish berý arqyly tirkele alady. Qaýipti dertti jeńýdiń negizgi amaly – vaktsına ekenin qaperde ustaıyq», – dedi ol.
Aıdar Sadyrbaevtyń aıtýynsha, Semeıde vaktsınatsııa pýnkteri emhanalar men iri kásiporyndarda jumys istep tur.
