Semeıde ırandyq ınvestorlar et óńdeıtin zaýyt salmaq
ASTANA. QazAqparat - Shyǵys Qazaqstan oblysynyń ákimi Danıal Ahmetov qazaqstandyq-ırandyq «Agro Portal» JShS basshysymen kezdesip, et óńdeýmen aınalysýǵa qyzyǵýshylyq tanytyp otyrǵan ırandyq ınvestorlardyń jobasyn talqylady, dep habarlaıdy «QazAqparat» HAA tilshisi ShQO ákiminiń baspasóz qyzmetine silteme jasap.
Oblys ákiminiń resmı saıtyndaǵy málimetke sáıkes, zamanaýı kásiporyn Semeıdegi «Óndiris» ındýstrıaldy aýmaǵynda boı kótermek. Zaýyt iske qosylǵannan keıin onda usaq jáne iri qara maldyń eti óńdelip, et konservileri men shujyq ónimderi shyǵarylmaq.
«Irandyq seriktesimizde eshqandaı másele týyndamaýy kerek. Biz qysqa merzimniń ishinde daıarlyq jumystaryn júrgizý úshin qajetti jaǵdaı jasaýǵa tıispiz», - dedi Danıal Ahmetov.
Óńir basshysynyń aıtýynsha, atalǵan aýmaqqa qajetti ınfraqurylymdyq jumystar júrizilip, «Bıznestiń jol kartasy - 2020» baǵdarlamasy boıynsha temir jol tarmaǵy jasalmaq. Qazirgi tańda zaýytty shıkizatpen qamtamasyz etý jumystary qarastyrylyp jatyr. Buǵan qosa ırandyqtar bordaqylaý alańyn ózderi qajetti qurylǵylarmen qamtýǵa daıyn ekendikterin bildirdi. Qazan aıynyń sońyna deıin ınvestıtsııalyq kelisimshart jasap, jer ýcheskesin bólý jumysy qalyp otyr. Jospar boıynsha 2018 jyldyń qańtar aıynda joba memlekettik organdardyń barlyq kelisiminen ótýi tıis.
