Semeıde halyq qajettiligin 100 paıyzǵa jabatyn et kombınaty salynady
Semeıde jeńil ónerkásiptiń jelkenine jel beretin iri joba qolǵa alynbaqshy. Ol úshin «Óńdiris» ındýstrııalyq aımaǵynda et kombınaty men untaqtaý-suryptaý keshenin salý josparlanyp otyr. Bul «Óndiristiń» 100% jumys isteýine múmkindik berýi tıis.
Qazirgi tańda «Óńdiris» ındýstrııalyq aımaǵynda úsh joba jumys istep tur. Bul - kóbik-beton buıymdaryn óndirý, jyljymaly quram úshin tejegish platformalardy shyǵarý jáne qatty turmystyq qaldyqtardy qaıta óńdeý jobalary. Endi olardyń qataryn joǵaryda atalǵan eki joba tolyqtyrmaq.
«Údemeli ındýstrııalyq-ınnovatsııalyq damý baǵdarlamasy aıasynda jobalardy damytýǵa erekshe nazar aýdarý qajet. Ásirese ırandyq ınvestorlar qyzyǵýshylyq tanytyp otyrǵan «Agroportal» JShS-niń jobasynan úlken úmit kútýge bolady. Bul eki joba júzege assa, «aqyldy tehnologııalardyń» arqasynda «Óndiris» te 100 paıyz ónim beretin bolady. Sol úshin ındýstrııalyq aımaqqa qosymsha temirjol tuıyǵyn tartyp bermekpiz», - dedi oblys ákimi Danıal Ahmetov Elbasy Joldaýyn talqylaýǵa arnalǵan aktıv jınalysynda.
«Agroportal» seriktestigine ınvestıtsııalyq jobany júzege asyrý úshin 55 gektar jer telimi berilýi tıis. Keshenniń qurylysyn ırandyq kompanııan qarjylandyrady.
«Agroportal» kompanııasy 1,5 mlrd teńgeniń tehnıkasyna tapsyrys berdi, Indýstrııa jáne jańa tehnologııalar mınıstrligi bul jobany maquldap otyr. Endi osy joba arqyly eskporttyq áleýetimizdi tıimdi paıdalaný ǵana qaldy», - deıdi D.Ahmetov.
Bolashaq kombınatty shıkizatpen qamtý máselesi de sheshimin tapqan. Bıyl oblysta halyq qajettiliginen tys 29,5 myń tonna sıyr etin, 13,4 myń tonna qoı men eshki etin óndirý josparlanǵan. 2021 jylǵa qaraı 34 myń tonna sıyr eti, 15,4 myń tonna qoı men eshki eti artyq ónidirilmek. Al «Agroportal» kompanııasy jylyna 24 myń tonna et óńdeýge qaýqarly.
