Semeıde grek-rım kúresinen jastar arasyndaǵy respýblıkalyq týrnır ótip jatyr
SEMEI. QazAqparat – Semeı qalasynda Jaqsylyq Úshkempirovtiń júldesine grek-rım kúresinen jastar arasyndaǵy respýblıkalyq týrnır jalaýyn kóterdi, dep habarlaıdy QazAqparat.
Dodaǵa Nur-Sultan, Almaty, Shymkent qalalarynyń, Almaty, Aqmola, Aqtóbe, Atyraý, Batys Qazaqstan, Jambyl, Qaraǵandy, Qostanaı, Qyzylorda, Mańǵystaý, Pavlodar, Soltústik Qazaqstan, Túrkistan jáne Shyǵys Qazaqstan oblystarynyń komandalary qatysýda. 200-den astam sportshy 10 salmaq dárejesinde baq synaıdy.
Búgin týrnırdyń saltanatty ashylýyna oblys ákimi Danıal Ahmetov qatysty.
«Bul jarys Olımpıada jáne Álem chempıony, Qazaqstannyń Eńbek Eri Jaqsylyq Úshkempirovtiń júldesi úshin ótýde. Jaqsylyqty bizdiń ulttyq qazynamyz deýge bolady. Jarqyn bolashaqta myńdaǵan jas sportshylarymyz álemdik básekelerde el namysyn abyroımen qorǵap, jeńis jalaýyn jelbiretetindigine senimdimin. Barlyq qatysýshylarǵa sáttilik tileımin!», - dedi aımaq basshysy.
