Semeıde ǵasyr jasaǵan 8 áje turady
SEMEI. QazAqparat - «El analary» jobasy aıasynda jasy 100-den asqan semeılik aq jaýlyqty ájelerge qurmet kórsetildi, dep habarlaıdy QazAqparat.
«Nur Otan» partııasynyń qalalyq fılıalynyń músheleri men isker áıelder qaýymdastyǵynyń ókilderi alǵash bolyp 102 jastaǵy Zeınezaıp Shúkshimbaevanyń úıine bardy. Qurmet kórsetip, syı-sııapattaryn tabystady. Eki ǵasyrdyń kýási bolǵan, zulmat jyldary aıanbaı ter tókken tyl ardageri Zeınezaıp ájeı shańyraǵyna arnaıy quttyqtaı kelgenderge alǵysyn bildirip, aq batasyn berdi.
102 jastaǵy áje 1947-1982 jyldary Besqaraǵaı aýdanynda orman sharýashylyǵynda qara jumysshy bolyp eńbek etken. Sanaly ǵumyrynyń birneshe jyly surapyl soǵys jyldarymen tuspa-tus kelgen keıýana búginde 2 balasynan 6 nemere, 13 shóbere, 6 shópshek súıip otyr.
"Soǵysty da, joqshylyq pen ashtyqty da kórdik qoı. Qazir zaman beıbit, tynysh. Qudaıǵa táýba. Bizder talaı zobalań jyldardy kórdik. Búgingi balalar baqytty. Bizde balalyq shaq bolǵan joq. Ómir boıy qara jumysta eńbek ettik. Biraq shúkir", - deıdi tyl ardageri.
Mereke qarsańynda arnaıy top jasy 100-den asqan 8 ájeniń úıine baryp quttyqtady. Shara partııanyń «Ardagerlerdi ardaqtaıyq», «Baqytty otbasy - baqytty balalyq shaq» jobalary aıasynda qolǵa alyndy.
